ދިރާގުން ކުރިއަށް ގެންދާ "ފޯ ދި އޯޝަން" ކެމްޕޭނުގެ ދަށުން ޕްލާސްޓިކު ފެންްފުޅި ބޭނުން ކުރުން އެ ކުންފުނީގެ ހުރިހާ މުވައްޒަފުން ހުއްޓާލައިފި އެވެ.
ދިރާގުން މިއަދު ނެރުނު ބަޔާނެއްގައި ބުނީ ކުންފުނީގެ އިޖްތިމާއީ ޒިންމާގެ ދަށުން ކުރި އަށް ގެންދާ ކެމްޕޭންގެ ހަރަކާތްތަކުގެ ތެރެ އިން މިއަދު ދިރާގުގެ މައި އޮފީހުގެ ހުރިހާ ބުރިއެއްގައި މުވައްޒަފުން ބޭނުން ކުރުމަށް ފެން ކޫލަރު ބަހައްޓާފައިވާ ކަމަށެވެ.
އަދި އެއް ފަހަރަށް ވުރެ ގިނައިން ބޭނުން ކުރެވޭ ގޮތަށް ތައްޔާރުކޮށްފައިވާ ދިރާގގެ ލޯގޯ ޖަހާފައިވާ ހާއްސަ ފެންފުޅިއެއް ވެސް ކޮންމެ މުވައްޒަފަކަށް ދީފައިވެ އެވެ.
ބަޔާނުގައި އަދި ބުނީ ދިރާގޔގެ ހެޑް އޮފީހުގެ އިތުރުން ނުވަ ސަރަހައްދެއްގައި ހުންނަ ދިރާގުގެ ރީޖަނަލް އޮޕަރޭޝަން ސެންޓަރުތަކުގައި ވެސް ފެން ކޫލަރު ބަހައްޓައިފައިވާ ކަމަށެވެ.
އޭގެ އިތުރުން އެ ކުންފުނީގެ ކޮންމެ ޑިޕާޓްމަންޓަކުން "ގްރީން ޗެމްޕިއަން" ގެ ނަމުގައި މުވައްޒަފުންގެ މެދުގައި އެމްބެސަޑަރަކު ވަނީ ހަމަޖައްސައިފަ އެވެ.
އެގޮތުން، ކޮންމެ ޑިޕާޓްމަންޓެއްގެ މުވައްޒަފުންނަށް ތިމާވެށި ހިމާޔަތް ކުރުމުގެ މުހިންމުކަން އަންގައި ދީ، ކެމްޕޭނުގެ ހަރަކާތްތައް ޑިޕާޓްމަންޓް ތެރޭގައި ކުރިއަށް ގެންދިއުމުގެ ޒިންމާ ގްރީން ޗެމްޕިއަނާ ހަވާލު ކޮށްފައިވެ އެވެ.
ދިރާގުން ކުރިއަށް ގެންދަ "ފޯ ދަ އޯޝަން" އަކީ ތިމާވެށި ހިމާޔަތް ކުރުމުގެ މަސައްކަތް ކުރާ ބައިނަލްއަގްވާމީ ޖަމިއްޔާ "ޕާލޭ" އާއި އެ ޖަމިއްޔާ އިން ހަމަޖައްސާފައިވާ ރާއްޖޭގެ އެސޯސިއޭޓް، ބީމްއާ ގުޅިގެން ކުރިއަށް ގެންދާ ކެމްޕޭނެކެވެ.