އަންނަ މަހުގެ އެއް ވަނަ ދުވަހުން ފެށިގެން ހަފުތާ އަކު ހަތަރު ދުވަހު ކޮލޮމްބޯ އާއި ގަމާ ދެމެދު ޝެޑިއުލް ދަތުރުތަކެއް ފަށަން ސްރީ ލަންކަން އެއާލައިންސުން ތައްޔާރުވަމުން ދަނިކޮށް ސިވިލް އޭވިއޭޝަން އޮތޯރިޓީން އެކަން ހުއްޓުވާލައިފި އެވެ.
ދަތުރު ފެށުމުގެ ހުއްދަތަށް ހޯދަން ސެޕްޓެމްބަރު މަހުގެ 23 ވަނަ ދުވަހު އެ އެއާލައިނުން ވަނީ ސިވިލް އޭވިއޭޝަނަށް ހުށަހަޅައިފަ އެވެ.
އެކަމާ ގުޅިގެން އެ އޮތޯރިޓީން ސްރީ ލަންކަން އެއާލައިންސަށް މި މަހުގެ 7 ވަނަ ދުވަހު ފޮނުވި ސިޓީއެއްގައި ބުނީ އިންޓަނެޝަނަލް ޝެޑިއުލް ފްލައިޓްތައް ގަމަށް އޮޕަރޭޓް ކުރަން ފެށޭ ވަރަށް އެ އެއާޕޯޓް އަދި ފުރިހަމަ ނުވާތީ ހުއްދަ ދެވެން ނެތް ކަމަށެވެ.
"އައްޑޫ ލައިވް" އަށް ކޮޕީ ވެސް ލިބިފައިވާ އެ ސިޓީގައި ބުނެފައި ވަނީ އިންޓަނެޝަނަލް ޝެޑިއުލް ފްލައިޓުތައް ހެންޑްލް ކުރުމަށް ބޭނުންވާ ސިސްޓަމްތައް ގަން އެއާޕޯޓްގައި އަޕްގްރޭޑްކޮށް އަދި ނުނިމޭ ކަމަށެވެ.
މީގެ އިތުރުބް އިންޓަނޭޝަނަލް ޝެޑިއުލް ފްލައިޓުތައް ހެންޑްލް ކުރުމަށް، ބޯޑާ ކޮންޓްރޯލުގައި ހަރަކާތްތެރިވާ ސަރުކާރު ކަމާ ބެހޭ އިދާރާތަކުން ވެސް ގަމުގެ އޮޕަރޭޝަނަށް ތައްޔާރު ނޫން ކަމަށް ބުނެފައިވެ އެވެ.
މިކަން މިގޮތަށް ސިވިލް އޭވިއޭޝަނުން މި އެންގީ ސްރީ ލަންކަން އެއާލައިންސް ޓިކެޓިން އޮފީހެއް ފޭދޫގައި ހުޅުވައި، ރިޒަވޭޝަން ވެސް ހަދައި ދެމުން ދަނިކޮށެވެ.
އެހެން ނަމަވެސް ސިވިލް އޭވިއޭޝަންގެ ނިންމުމާ ގުޅިގެން ސްރީ ލަންކަން އެއާލައިންސްގެ ދަތުރުތައް ގަމަށް ފެށޭނެ އިރެއް މިހާރު އޮތީ ނޭނގުމެއްގެ ތެރޭގަ އެވެ.
އެކަމަކު އެއާލައިންގެ ޓިކެޓިން އޮފީހުން ބުނީ އެތަނުގެ މަސައްކަތް ކުރިއަށް ދާނެ ކަމަށެވެ.