މިއަހަރުގެ މޭއި މަހުގެ ދެ ވަނަ ދުވަހު ހިތަދޫ އަލަ އޮޅެއްގެ ތެރެއިން އަނިޔާވެރިގޮތަކަށް މަރާލާފައި އޮއްވައި ފެނުނު ސ.ހިތަދޫ ވިޔަފާވެރިޔާ އަލީ އަބްދުﷲ ގެ މަރުގެ މައްސަލާގައި ހައްޔަރު ކުރި ހަތަރު މީހުންގެ މައްސަލަ ތަހްގީގު ނިންމައި ދައުވާ ކުރުމަށް ޕްރޮސެކިއުޓާރ ޖެނެރަލް (ޕީޖީ)އޮފީހަށް ފޮނުވައިފިއެވެ.
ފުލުހުންގެ މީޑިއާ އޮފިޝަލް "އައްޑޫލައިވް"އަށް މައުލޫމާތުދެމުން ވިދާޅުވީ އެމައްސަލަ ދައުވާ ކުރަން ޕީޖީ އޮފީހަށް ހުށަހަޅާފައިވަނީ މިދިޔަ ސެޕްޓެމްބަރ މަހުގެ 29 ވަނަ ދުވަހުއެވެ.
އަލީގެ މަރުގެ މައްސަލާގައި ހައްޔަރުކޮށްފައިވާ ހަތަރު މީހުންގެ ތެރޭގައި އަލީ އަށް ބޮޑުބޭބެ ކިޔާ ހިތަދޫ ހެޕީ ފިއުޗާ އަހުމަދު އިބްރާހީމްދީދީ، 39، ވެސް ހިމެނެ އެވެ.
އަލީގެ މަރުގެ މައްސަލައިގެ ތަހްގީގް އެކަށީގެންވާ އަވަސް ގޮތަކަށް ކުރިއަށް ނުދާކަމަށް ބުނެ ހިތަދޫގެ ރައްޔިތުންގެ ތެރެއިން ގިނަ ބަޔަކު ވަނީ ހިނގާލުމެއް ބާއްވައި ފުލުހުންނާއި ވެސް ބައްދަލުކޮށްފައެވެ.
މި ހާދިސާ އަކީ ފަހުގެ ތާރީހެއްގައި އައްޑޫގައި ހިނގާދިޔަ އެންމެ ހިތާމަވެރި އެއްހާދިސާއެވެ. އަނިޔާވެރި ގޮތަަކަށް މަރާލި އަލީ އަބްދުﷲ އަކީ ހިތަދޫގެ ވަރަށް ގިނަ ބަޔަކާއި ގާތް ގުޅުމެއް ބޭއްވި މަޑުމައިތިރި މީހެކެވެ.