ގަން އެއާޕޯޓްގެ ރަންވޭ ބޮޑު ކުރުމުގެ މަސައްކަތް ނިމި، އެ އެއާޕޯޓް ތަރައްގީގެ މަޝްރޫއު ނިމިގެން އަންނަ އިރު އެންމެ ބޮޑު އަމާޒަކީ ދުވާލެއްގެ މައްޗަށް އިންޓަނެޝަނަލް ހަތަރު ފްލައިޓް އޮޕަރޭޓް ކުރާ އެއާޕޯޓަކަސް ގަން އެއާޕޯޓްވެގެން ދިއުން ކަމަށް އައްޑޫ އިންޓަނެޝަނަލް އެއާޕޯޓް ކޮމްޕެނީ (އޭއައިއޭ) އިން ބުނެފި އެވެ.
ބޮއިން 777 އާއި އޭ340 މަރުކާގެ ބޯޓްތަަކަށް ޖެއްސޭ ވަރަށް ގަން އެއާޕޯޓްގެ ރަންވޭ ތަރައްގީކޮށް ނިމިފައިވާތީ އަންނަ އަންގާރަ ދުވަހު ރަސްމީކޮށް ރަންވޭ ހުޅުވަން ވަނީ ނިންމައިފަ އެވެ.
ގަމަށް މި ވަގުތު ބާއްވަނީ ގައުމީ އެއާލައިން މޯލްޑިވިއަން އާއި ބޭރުގެ ބައެއް ޗާޓަރު ދަތުރުތަކެވެ.
އެހެން ނަމަވެސް އަންނަ މަހުގެ އެކަކުން ފެށިގެން ސްރީ ލަންކަން އެއާލައިންސުން ގަމަށް ޝެޑިއުލް ދަތުރުތައް ފެށުމުގެ ހުއްދައަކަށް މިހާރު ވަނީ އެދިފަ އެވެ.
އޭއައިއޭގެ ޑެޕިއުޓީ ޖެނެރަލް މެނޭޖަރު އިބްތިޝާމާ އަހުމަދު ސައީދު ވިދާޅުވީ އަމާޒަކީ ޑޮމެސްޓިކް ފްލައިޓްތަކުގެ އިތުރުން ދުވާލެއްގެ މައްޗަށް އިންޓަރނޭޝަނަލް ހަތަރު ފްލައިޓް ދަތުރު ކުރާ އެއާޕޯޓަކަށް އެތަންވެގެން ދިއުމެވެ.
އޭނާ ވިދާޅުވީ ގަމަށް ސީދާ ދަތުރުތައް ފެށުމުގެ ޝަޢުގުވެރިކަން މިހާރު ވެސް އެއާލައިންތަކުން ފާޅުކުރަމުން އަންނަ ކަމަށެވެ.
"ޗާޓަރު ފްލައިޓްތައް މިހާރުވެސް ގަމަށް އާދޭ. އަޅުގަނޑުމެންނަށް ސްރިލަންކަން އެއާލައިނާ އެކު ވަރަށް ބޮޑަށް މަޝްވަރާ ކުރެވެމުންދޭ ދަތުރުތައް ފެށު މާގުޅޭ ގޮތުން. އެ ބޭފުޅުން މިހާރު ޝެޑިއުލްވެސް ކުރައްވައިގެން އުޅުއްވަނީ. އިންޓަނޭޝަނަލް ޝެޑިއުލް ފްލައިޓެއް އަންނަ ކަމަށްވާ ނަމަ ފުރިހަމަ ކުރަން ޖެހޭ އިތުރު ކަންތައްތަކެއް ހުންނާނެ،" އިބްތިޝާމާ ވިދާޅުވި އެވެ. "އިމިގްރޭޝަނާއި، ކަސްޓަމްސްގެ ދާއިރާއިން ވެސް. އަދި ސަލާމަތީ ގޮތުން ވެސް. އެހެންވީމަ އެ މަސައްކަތް އަޅުގަނޑުމެން ހުރިހާ ސްޓޭކް ހޯލްޑަރުންނާ އެކު ކުރަމުން މި އަންނަނީ. އިންޓަނޭޝަނަލް ފްލައިޓްތައް އޮޕަރޭޓް ކުރުމުގެ ޝަޢުގުވެރިކަން ވަރަށް ގިނަ ފަރާތްތަކުން ފާޅުކު ރަމުންދަނީ."
ގަމުގައި ސީ ޕްލޭން ބޭސްްއެއް ވެސް މިހާރު ވަނީ ގާއިމުކޮށްފަ އެވެ.
އެތަން އޮޕަރޭޓްކޮށް، ހިދުމަތް ދޭން ހަވާލުކޮށްފައި ވަނީ ޓްރާންސް މޯލްޑިވިއަން އެއާވޭސް (ޓީއެމްއޭ) އާ އެވެ.