އައްޑޫގެ ސްކޫލުތަކަށް އަމާޒުކޮށްގެން އެމްއެންޑީއެފް ސަދަން އޭރިއާގައި ރީޖަނަލް ކެޑޭޓް ކޭމްޕެއް ފަށައިފި އެވެ.
މި ކޭމްޕުގައި، އައްޑޫގެ ހުރިހާ ސްކޫލުތަކަކުން، 56 ކެޑޭޓުން ބައިވެރިވެ އެވެ.
މި މަހު 12-16 އަށް ކުރިއަށް ގެންދާ ކެޑޭޓް ކޭމްޕުގައި، އުނގަންނައި ދެވޭ ބައިތަކުގެ ތެރޭގައި ފިޒިކަލް ޓްރޭނިން، ރައިފަލް ޑްރިލް، ބޭސިކް ފީލްޑްކްރާފްޓް، ބޭސިކް ފަޔާ ފައިޓިން، ބޭސިކް ފީލްޑް ފަސްޓްއެއިޑް، އަންއާމްޑް ކޮމްބެޓް، މެރިޓައިމް ސްޓަޑީޒް، ލީޑަޝިޕް ފަދަ ބައިތައް ހިމެނެ އެވެ.
މި ކެޑޭޓް ކޭމްޕް ބޭއްވުމުގެ މަޤްޞަދުތަކުގެ ތެރޭގައި ކެޑޭޓުންގެ އަހުލާގީ ވާޖިބުތައް ދަސްކޮށް ދިނުމާއި، ސްކޫލުތަކުން މި ކޭމްޕުގައި ބައިވެރިވާ ދަރިވަރުންގެ މެދުގައި އެކުވެރިކަމާއި އެއްބައިވަންތަކަމުގެ ރޫޙް އާލާކުރުމާއި، އަދަބު އަޚްލާޤާއި ސްލޫކު އަށަގެންނެވުމާއި، ޤާނޫނާއި ޤަވާޢިދަށް ހުރުމަތްތެރިކޮށް ހިތުމުގެ މުހިންމުކަން އަންގައި ދިނުމުގެ އިތުރުން، ޤައުމީ ރޫހު އުފައްދައި ދިރުވުން ވެސް ހިމެނޭ ކަމަށް އެމްްއެންޑީއެފުން ބުންޏެވެ.
ކޭމްޕުގައި މުދައްރިބުންގެ ގޮތުގައި މަސައްކަތް ކުރަނީ އެމްއެންޑީއެފް ސަދަން އޭރިއާގެ ސިފައިންނާއި، މޯލްޑިވްސް ނޭޝަނަލް ކެޑޭޓް ކޯގެ މުދައްރިބުންނެވެ.
ކެޑޭޓް ކޭމްޕުގެ ކޮމާންޑަރުގެ ގޮތުގައި އެމްއެންޑީއެފްގެ ފަސްޓް ލެފްޓިނެންޓް އަޙްމަދު ހަނީފު ބައިވެރިވެވަޑައިގަންނަވާ އިރު، އެޖުޓަންޓްގެ ގޮތުގައި ބައިވެރިވެލައްވަނީ އެމްއެންސީސީގެ ކެޕްޓަން އައިމިނަތު ސަލްމާ އެވެ.