އައްޑޫ އިކުއެޓޯރިއަލް ކޮންވެންޝަން ސެންޓަރު (އީސީސީ) 100 އެނދުގެ ޓާޝިއަރީ ހޮސްޕިޓަލަކަށް ބަދަލު ކުރަން ރާއްޖޭގެ ކުންފުންޏެއް ކަމަށްވާ އެލިއާ ކޮންސްޓްރަކްޝަނާ 161.8 މިލިއަން ރުފިޔާ އަށް މިއަދު ހަވާލުކޮށްފި އެވެ.
ހައުސިން މިނިސްޓްރީގައި އޮތް ރަސްމިއްޔާތެއްގައި މި މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ޑރ. މުހައްމަދު މުއިއްޒެވެ.
އެލިއާގެ ފަރާތުން ސޮއި ކުރެއްވީ އެ ކުންފުނީގެ ޑިރެކްޓަރު އަތޯ އަލީ އެވެ.
މުއިއްޒު ވިދާޅުވީ ސައުދީ ފަންޑާއި އޯޕެކް ފަންޑުން ފައިސާ ހަޖައްސައިގެން ކުރިއަށް ގެންދާ މި މަޝްރޫއުގައި ފުރަތަމަ ހެދީ އިންޖިނިއަރިން އެސެސްމަންޓެއް ކަމަށެވެ.
އަދި އާއްމުކޮށް ހުޅުވާލައިގެން އެންމެ ރަނގަޅު ޕްރޮޕޯސަލެއް ހުށަހެޅި ފަރާތަކާ ހަވާލުކޮށްގެން ހެދި މި އެސެސްމަންޓުން، އީސީސީއަކީ ހޮސްޕިޓަލެއް ހެދޭނެ ތަނެއްކަން އެނގިފައިވާ ކަމަށް މިނިސްޓަރު ވިދާޅުވި އެވެ.
އިންޓަނެޝަނަލް މިންގަނޑުތަކާ އެއްގޮތަށް ކުރިއަށް ގެންދިޔަ ބިޑުގެ ކަންތައްތަކުގައި، ހަތަރު ފަރާތަކުން ބިޑް ހުށަހެޅި އެވެ. އަދި އެންމެ ކުޑަ އަގެއް ހުށަހެޅީ އެލިއާ އިންނެވެވެ.
"މި ނިންމުމަކީ ކޮންވެންޝަން ސެންޓަރު އަދި އައްޑޫ ސިޓީގެ ބިން އެންމެ އެދެވޭ ގޮތުގައި ބޭނުން ހިފޭނެ ގޮތަށް ވިސްނައިގެން ނިންމާފައިވާ ނިންމުމެއް،" މުއިއްޒު ވިދާޅުވި އެވެ. "މުޅިން އާ އިމާރާތެއް ހަދައިގެން މިވަރުގެ ހޮސްޕިޓަލެއް ހަދާ ކަމުގައިވާ ނަމަ ވަރަށް ބޮޑު ހަރަދެއް ދާނެ."
ހައުސިން މިނިސްޓަރުގެ ނައިބު އަބްދުﷲ މުއްތަލިބު ވިދާޅުވީ އެލިއާއާ ހަވާލުކޮށްފައިވާ މަސައްކަތުގެ ތެރޭގައި ހިމެނޭ އެންމެ މުހިންމު މަސައްކަތަކީ އީސީސީގެ ދެވަނަ ބުރި ބަދަލުކޮށް، މުޅި ކޮންވެންޝަން ހޯލް ދެ ބުރީގެ އިމާރާތަކަށް ހެދުން ކަމަށެވެ.
މީގެ އިތުރުން އީސީސީގެ ހުރިހާ ކޮޓަރިއެއް ހޮސްޕިޓަލެއްގައި ހުންނާނެ ފަދަ ކޮޓަރިތަކަށް ބަދަލުކޮށް، ސިއްހީ ހިދުމަތް ފޯރުކޮށްދޭ ތަނެއްގައި ހުންނާނެ އިންޓީރިއާ ހުރިހާ ކަމެއް ފުރިހަމަ ކުރާނެ ކަމަށް ވިދާޅުވި އެވެ.
މުއިއްޒު ވިދާޅުވީ ޑިޒައިން އެންޑް ބިލްޑް އުސޫލުން އެލިއާއާ މަސައްކަތް ހަވާލު ކުރީ 18 މަސް ދުވަހުގެ ތެރޭގައި ނިންމާ ގޮތަށް ކަމަށެވެ.
އެހެންވެ ހުރިހާ މަސައްކަތެއް ނިންމައި އެންމެ ލަސްވެގެން މޭ 8، 2018 ގައި އެ ތަން މިނިސްޓްރީއާ ހަވާލު ކުރާނެ ކަމުގެ ޔަގީންކަން އެލިއާ އިން ދީފައިވާ ކަމަށް ވިދާޅުވި އެވެ.
މި މަސައްކަތާއެކު އެކީގައި ހޮސްޕިޓަލަށް ބޭނުންވާ މެޑިކަލް އާލާތްތަކާއި ވަސީލަތްތައް ހޯދުމުގެ މަސައްކަތް ވެސް ކުރިއަށް ގެންދާނެ ކަމަށް މިނިސްޓަރު ވިދާޅުވި އެވެ.
އަދި އެކަމަށް ބޭނުންވާ ފައިސާ ވެސް ހަމަޖެހިފައިވާ ކަމަށާއި އުސޫލުތަކުގެ ތެރެއިން އެ މަސައްކަތް ހަވާލު ކުރާނެ ބަޔަކު ހޯދުމުގެ މަސައްކަތް ވެސް ކުރިއަށް ގެންދާނެ ކަމަށް ވިދާޅުވި އެވެ.
އީސީސީ ހޮސްޕިޓަލަކަށް ބަދަލު ކުރަން އުޅޭތީ އައްޑޫ ސިޓީ ކައުންސިލާއި އައްޑުގެ ބައެއް ރައްޔިތުން ދަނީ ކަންބޮޑުވުން ވެސް ފާޅު ކުރަމުންނެވެ.