މި އަހަރުގެ ދެވަނަ ކުއާޓަރުގައި ޖީއެސްޓީ ނުދައްކައިގެން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އާންމު ކުރި ލިސްޓްގައި އައްޑޫގެ ހަތަރު ތަނެއް ހިމެނިއްޖެ އެވެ.
ލިސްޓްގައި ހިމެނޭ ހަތަރު ތަނަކީ ގަމުގައި "އައްޑޫ ހެރިޓޭޖް" ގެ ނަމުގައި ހިންގާ ތަނަކާއި ހިތަދޫ ރޯޔަލް ޕްލަސް ރެސްޓޯރަންޓާއި ފޭދޫ ދެތަނޑި ފިހާރަ އެކެއްގެ އިތުރުން ހުޅުދޫ ސެވެން ތުރީ އެވެ.
އައްޑޫ ހެރިޓޭޖަކީ ފޭދޫ ކައުންސިލަރު އަލީ ފަހުމީ އަހުމަދު ހިންގަވާ ތަނެއްކަން ފާހަގަކޮށްލެވެ އެވެ.
މީރާ އިން ބުނީ ޖީއެސްޓީ ނުދައްކާ ފަރާތްތަކުގެ ލިސްޓް އާންމު ކުރީ ނަން ހާމަ ކުރުމުގެ އުސޫލުގެ ދަށުން އާންމުކޮށްފައިވާ، 2016 ވަނަ އަހަރުގެ ދެވަނަ ކުއާޓަރުގެ ޖީއެސްޓީ ބަޔާން ހުށަނާޅައި އަދި ޓެކްސް ނުދައްކާ ފަރާތްތަކުގެ ސަމާލު ކަމަށް އެކަން ގެންނަން ކަމަށެވެ.