އިސްލާމް ދީނުގެ ރިވެތި އުސޫލްތަކާ އެއްގޮތަށް ދަރިން ތަރުބިއްޔަތު ކުރުމާ ބެހޭ ގޮތުން މަހަލްދީބް ފައުންޑޭޝަނާއި ހިތަދޫ ނޫރުލް އިސްލާމް ޖަމިއްޔާ ގުޅިގެން ބާއްވަމުން އަންނަ "ތަރުބިއްޔަތު" ވޯކްޝޮޕްތަކުގެ ތެރެއިން ވޯކްޝޮޕެއް އަންނަ ހަފުތާގައި އައްޑޫގައި ބާއްވަން ނިންމައިފި އެވެ.
މި މަހުގެ 25-26 އަށް ބާއްވާ ވޯކްޝޮޕްގައި ބައިވެރިވުމަށް ރަޖިސްޓްރީ ކުރުމުގެ ފުރުސަތު ވެސް ވަނީ ހުޅުވާލައިފަ އެވެ.
ފީއަކަށް 500ރ. ދައްކަން ޖެހޭ މި ވޯކްޝޮޕަށް ނަން ނޯޓް ކުރަން ގުޅެން ޖެހެނީ 7636649 އަށެވެ.
ޝެއިހް މުހައްމަދު އަނީލް އާއި ދާއިރާގެ އިތުރު ތަޖުރިބާކާރުންނާ އެކު ބާއްވާ "ތަރުބިއްޔަތު" ވޯކްޝޮޕްގައި ތަފާތު މައުޟޫތަކަށް ބައިވެރިންނަށް މައުލޫމާތު ދޭނެ އެވެ.
އޭގެ ތެރޭގައި ރަސޫލާގެ ގެކޮޅުގައި، ޕޮޒިޓިވް ޕޭރެންޓިން، ދެމަފިރިންގެ ހައްގުތައް، ކުށް އިސްލާހު ކުރާނެ ނަބަވީ 10 އުކުުޅު، އެކި އުމުރުފުރާގެ ކުދިން ތަރުބިއްޔަތު ކުރުން އަދި ތަރުބިއްޔަތަށް އެޅޭ ހުރަސްތައް ފަދަ މައުޟޫތައް ހިމެނެ އެވެ.
"ތަރުބިއްޔަތު" ގެ ވޯކްޝޮޕެއް ދާދި ފަހުން ވަނީ މާލޭގައި ވެސް ބާއްވައިފަ އެވެ.