ދިވެހި އަސްކަރިއްޔާގެ ތަޞައްވަރާއި މިސްރާބަށް ވާޞިލްވުމަށާއި، އަސްކަރިއްޔާގެ މުހިއްމު ކަންކަމާއި ބެހޭ ގޮތުން މަޝްވަރާ ކުރުމަށް މަގުފަހިކޮށް ދިނުމަށް ދިވެހި އަސްކަރިއްޔާގެ "ތިންކް ޓޭންކް" ގެ ނަމުގައި ޑިފެންސް މިނިސްޓަރު އާދަމް ޝަރީފް އުމަރު ކޮމެޓީއެއް އެކުލަވާލައްވައިފި އެވެ.
މި ކޮމެޓީގެ ފުރަތަމަ ބައްދަލުވުން އިއްޔެ ބަންޑާރކޮށީގައި ވަނީ ބާއްވައިިފަ އެވެ.
އެ ބައްދަލުވުމުގައި މަޝްވަރާ ކުރެއްވީ އަސްކަރިއްޔާ ހަރުދަނާ ކުރުމާއި، އަސްކަރިއްޔާގެ ދުރު ރާސްތާ ޕްލޭނެއް އެކުލަވާލުމާ ގުޅޭ ގޮތުންނެވެ.
އަސްކަރިއްޔާގެ "ތިންކް ޓޭންކް" ގެ ނަމުގައި އެކުލަވާލެއްވި މި ކޮމެޓީގައި ހިމެނިވަޑައިގަންނަވާ ބޭފުޅުންނަކީ ޗީފް އޮފް ޑިފެންސް ފޯސް މޭޖަ ޖެނެރަލް އަޙްމަދު ޝިޔާމާއި، ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަޙްމަދު ޝާހިދުގެ އިތުރުން މޭޖަރ ޖެނެރަލް ރިޓަޔަރޑް މުޙައްމަދު ޒާހިރު، ބްރިގޭޑިއާ ޖެނެރަލް ޒަކަރިއްޔާ މަންޞޫރު، ބްރިގޭޑިއާ ޖެނެރަލް ޢަލީ ޒުހައިރު، ބްރިގޭޑިއާ ޖެނެރަލް ރިޓަޔަރޑް އަޙްމަދު މުޙައްމަދު، ބްރިގޭޑިއާ ޖެނެރަލް ރިޓަޔާޑް އަޙްމަދު ނަޢީމް މުޙައްމަދު، ކޮމިޝަނަރު އޮފް ޕޮލިސް ރިޓަޔާޑް އާދަމް ޒާހިރު އަދި ޑެޕިއުޓީ ކޮމިޝަނާރު އޮފް ޕޮލިސް ރިޓަޔާޑް ޢަބްދުއްޝުކޫރު ޢަބްދުﷲ، ޑރ. އިބްރާހީމް ޙަސަން، ޑރ. ޢަލީ ފަވާޒް ޝަރީފެވެ.