ދިރާގުން މެލޭޝިއާގެ އައިފްލިކްސް ދިރާގުން ރޭ ރާއްޖެ އަށް ތައާރަފްކޮށްފި އެވެ.
ދިރާގުގެ މައި އޮފީހުގައި ބޭއްވި ހާއްސަ ހަފުލާއެއްގައި އެ ހިދުމަތް ތައާރަފުކޮށް ދެއްވީ ދިރާގުގެ ޗީފް މާކެޓިން އޮފިސަރު އިޒަބެލް ހާޖްރީ އާއި އައިފްލިކްސްގެ ހެޑް އޮފް ނިއު މާކެޓްސް މާޓިން ޖޮހެންސަން އެވެ.
އިޒަބެލް ވިދާޅުވީ ދިރާގުން އަބަދު ވެސް މަސައްކަތް ކުރަނީ ޓެކްނޮލޮޖީއާ ގުޅުން ހުރި ދުނިޔޭގެ މަޝްހޫރު ހިދުމަތްތައް ބޭނުން ކުރުމުގެ ފުރުސަތު ދިވެހިންނަށް ހޯދައި ދިނުމެވެ. އަދި އައިފްލިކްސް ފަދަ ހިދުމަތެއް ރާއްޖެ އަށް ތައާރަފް ކުރުމަކީ ދިރާގަށް ލިބޭ ވަރަށް ބޮޑު އުފަލެކެއް ކަމަށް ވިދާޅުވި އެވެ.
މާޓިން ވިދާޅުވީ ދިވެހިން ޓެކްނޮލޮޖީ އަށް ބަރޯސާވެފައިވާ މިންވަރާއި ސްމާޓްފޯން ފަދަ ޒަމާނީ އާލާތްތައް ދިވެހިން ބޭނުން ކުރާ މިންވަރު ވަަރަށް ބޮޑަށް ވަޒަން ކުރެވިފައިވާ ކަމަށާއި ރާއްޖެ އަކީ އައިފްލިކްސް ތައާރަފް ކުރަން އެންމެ އެކަށީގެންވާ އެއް ގައުމު ކަމަށެވެ.
އައިފްލިކްސް ތައާރަފް ކުރުމުން ވެގެން ދާނީ ހަމައެކަނި ދިރާގުގެ ކަސްޓަމަރުންނަށް ރާއްޖޭގައި ބޭނުން ކުރެވޭ ހިދުމަތަކަށެެވެ. އަދި ހިދުމަތް ރޭ ތައާރަފު ކުރުމަށް ފަހު ވަނީ ހާއްސަ ޕްރޮމޯޝަނެއް ވެސް ފަށައިފަ އެވެ.
އެ ގޮތުން، މި ހިދުމަތަށް ސަބްސްކްރައިބް ކުރުމުން، ފުރަތަމަ ތިން މަސް ދުވަހު ހިލޭ އައިފްލިކްސްގެ ލައިބްރަރީގައި ހިމެނޭ ހުރިހާ އެއްޗެއް ބަލައިލުމުގެ ފުރުސަތު ލިބޭނެ އެވެ.
އައިފްލިކްސް އިން މެލޭޝިއާގެ އިތުރުން، ތައިލެންޑާއި ފިލިޕީންސާއި އިންޑޮނީޝިއާ އާއި ބްރޫނާއީ އަދި ސްރީ ލަންކާގައި ވެސް މިހާރު ހިދުމަތް ދެމުން ދެ އެވެ.
އަދި އެ ކުންފުނިވެފައި ވަނީ ދުނިޔޭގެ އެންމެ ބާރަށް ކުރިއަރަމުން މީޑިއާ ކޮންޓެންޓް ޕްލެޓްފޯމަށެވެ.
އައިފްލިކްސް އިން ހޮލީވުޑާއި ބޮލީވުޑް އަދި ދުނިޔޭގެ އެހެން ބައެއް ގައުމުތަކުގެ ވެސް ފިލްމު އަދި ޓީވީ ސީރީޒްތައް އުފައްދާ ކުންފުނިތަކާ ގުޅިގެން އެތައް ހާސް ފިލްމާއި ޓީވީ ޝޯ ގެނެސްދެ އެވެ.