މީގެ ދުވަސްކޮޅެއް ކުރިން އެމެރިކާގެ މަޝްހޫރު ސެލެބްރިޓީ ކިމް ކާޑޭޝިއަން ޕެރިހަށް ގޮސް އުޅެނިކޮށް، މޫނު ނިވާކޮށްގެން ތިބި ބަަޔަކު އޭނާ އަށް ހަމަލާދީ ފޭރިގެންފައިވެ އެވެ.
އެފަދަ ހާދިސާއެއް ފްރާންސްގައި އަނެއްކާ ވެސް ހިނގައިފި އެވެ.
މި ފަހަރު އެ ކަހަލަ ބިރުވެރިކަމަކާ ކުރިމަތިލާން ޖެހުނީ މިހާރު ހޮލީވުޑްގައި ވެސް މަސައްކަތް ކުރާ ބޮލީވުޑްގެ ބަތަލާ މަލިކާ ޝަރާވަތަަށެވެ.
އޭނާ ފްރާންސްގެ ލޯބިވެރިޔާ އާ އެކު ޕެރިހުގެ ގޭގައި އުޅެނިކޮށް، މޫނު ނިވާކޮށްގެން ތިބި ބަޔަކު، އެ މީހުންގެ ގަޔަށް ޓިއާ ގޭސް ޖަހައި، ހަމަލާދީ، ފޭރި ގަންނަން މަސައްކަތްކޮށްފައިވެ އެވެ.
މި ހާދިސާގައި "މާޑާ" ފަދަ ފިލްމްތައް ކުޅެފައިވާ މަލިކާ އާއި އޭނާގެ ލޯބިވެރިޔާ އަށް ވެސް ކުދިކުދި ބައެއް ޒަހަމްތައްވި އެވެ. މި މައްސަލަ މިހާރު ފްރާންސްގެ ފުލުހުން އަންނަނީ ތަހުގީގު ވެސް ކުރަމުންނެވެ.
ސީއެންއެން އަށް މަލިކާ ބުނީ އޭނާ އަށް ހަމަލާ ދިނީ ސީދާ ކޮން ސަބަބަކާ ހުރެކަން އެއްގޮތަކަށް ވެސް ނޭނގޭ ކަަމަށެވެ. އަދި ކުށްވެރިންގެ ފަރާތުން ދިމާވާ އެކަހަލަ ކަންތައްތަކާ ބިރުން ނޫޅޭ ކަމަށް ބުންޏެވެ.
"އެ މީހުން އަހަރަމެންގެ ގަޔަށް ޓިއާ ގޭސް ޖަހާފައި އަހަރެންގެ އަތް ދަބަސް ވެސް ފޭރި ގަންނަން އުޅުނު،" މަލިކާ ބުންޏެވެ. "އެހެންވެ ބޮޑަށް ބެލެވެނީ ފައިސާގެ ބޭނުމުގައި ފޭރި ގަންނަން އުޅުނު ބައެއް ކަމަށް."