ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕޭން މޯލްޑިވްސް ޔުނައިޓެޑް އޮޕޮޒިޝަން (އެމްޔޫއޯ) އިން ލޯންޗް ކުރުމަށްޓަކައި ކާނިވާ ސަރަހައްދު ދޫކުރަން ދެކޮޅު ހަދާތީ، ކެމްޕޭން އައްޑޫގައި ލޯންޗް ކުރަން ނިންމައިފި އެވެ.
އެމްޔޫއޯ އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޑެޕިއުޓީ ޗެއާ ޕާސަން އަލީ ނިޔާޒް ވިދާޅުވީ ކާނިވާ ސަރަހައްދު ހޯދުމަށް އެދި ސަރުކާރަށް ސިޓީ ފޮނުވި ނަމަވެސް ޖަވާބެއް ނުލިބޭ ކަމަށެވެ.
އޭނާ ވިދާޅުވީ ހުއްދަ ދިނަސް ނުދިނަސް އަންނަ ހުކުރު ދުވަހުގެ ރޭ އައްޑޫގައި ރަސްމީކޮށް އެމްޔޫއޯއަށް ނިސްބަތްވާ ކެންޑިޑޭޓުންގެ ކެމްޕޭން ލޯންޗް ކުރާނެ ކަމަށެއެވެ.
"ސަރުކާރުން ހުއްދަ ދިނަސް ނުދިނަސް އައްޑޫގައި އަޅުގަނޑުމެން ކެމްޕޭން ރަސްމީކޮށް ފަށާނަން. އެކަމަކު މާދަމާ ވެސް ނޫނީ މިއަދު ވެސް ކާނިވާ ސަރަހައްދު ލިބިއްޖެއްޔާ ރަސްމީކޮށް ލޯންޗް ކުރާނީ މާލޭގައި." އޭނާ ވިދާޅުވި އެވެ.
ނިޔާޒް ވިދާޅުވީ އައްޑޫގައި ކެމްޕޭން ފެށުމަށް ހާއްސަ ޖަލްސާއެއް ބާއްވަން ނިންމި ނަމަވެސް މާލޭގައި ވެސް ކެމްޕޭން ހަރަކާތްތަށް ކުރިއަށް ގެންދާނެ ކަމަށެވެ.
އެމްޔޫއޯ އިން ބުނީ ކާނިވާ ސަރަހައްދުގައި ޖަލްސާއެއް ބާއްވަން ހުއްދަ ނުދޭން އުޅެނީ ޕީޕީއެމުން އިންތިހާބަށް ތައްޔާރު ނުވާތީ އާއި އެ ޕާޓީން ކެމްޕޭން އަދި ލޯންޗް ނުކުރާތީ ކަމަށް ގަބޫލް ކުރެވޭ ކަމަށެވެ.
ކައުންސިލް އިންތިހާބަށް އެމްއޯޔޫން ނިކުންނަނީ އެމްޑީޕީ އާއި އަދާލަތު ޕާޓީ ގުޅިގެންނެވެ.