ބަށި ބޯލް އެސޯސިއޭޝަން އޮފް މޯލްޑިވްސްއިން އިންތިޒާމްކޮށްގެން ބާއްވާ އެސްޓީއޯ ހޯމް އިމްޕްރޫމަންޓް ބަށި މުބާރާތުގައި މި ފަހަރު މީދު އާ އެކު ޖުމްލަ 16 ޓީމް ހިމެނޭ ގޮތަށް މުބާރާތް އިއްޔެ ފަށައިފި އެވެ.
ހަތަރު ގްރޫޕަކަށް ބަހާލައިގެން ކުރިއަށް ގެންދާ މުބާރާތް ރަސްމީކޮށް ފައްޓަވައި ޔޫތު މިނިސްޓަރު އިރުތިޝާމް އާދަމެވެ.
މި މުބާރާތް ބެހިފައިވާ ގޮތަށް ބަލާ އިރު ގްރޫޕް އޭ ގައި ހިމެނެނީ ފީއަލީ ޒުވާނުންގެ ގުޅުމާއި ހުޅުމާލޭ ވިމެން ސްޓާގެ އިތުރުން މައްޗަންގޮޅި ވިދާތަރި އާއި ވިދުވަރެވެ.
ގްރޫޕް ބީގައި ހިމެނެނީ ރ. އިނގުރައިދޫ ކާމިޔާބު ޓީމާއި ލ. މާއެނބޫދޫ އިސްދަރިވަރުންގެ ގުޅުމާއި މަހިބަދޫ ސްޕޯޓްސް ކުލަބުގެ އިތުރުން ހުޅުމާލޭ ވިމޭން ސްޕޯޓްސްއެވެ.
ގުރޫޕް ސީ ގައި ހިމެނެނީ ލ. ގަމު މާސް އާއި ޅ. ނައިފަރުގެ ގުއޮށި އާއި ފީއަލީ އެކުވެރި ޒުވާނުންގެ ރޫހާއި ހުޅުމާލޭ ދިރުން ޓީމެވެ.
ގުރޫޕް ޑީ ގައި ހިމެނެނީ މީދޫ ބަށި ހިތްވަރު ޓީމާއި ތ. އޮމަދޫ އުޖާލާ ޓީމާއި މާފުށީ ނިއުސްޓާގެ އިތުރުން ގަލޮޅު ރަންކަނި ޓީމެވެ.
މުބާރާތުގެ ކްއާޓާ ފައިނަލަށް ދާނީ ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމެވެ.
ކްއާޓާ ފައިނަލް މެޗްތައް ކުޅުމަށް ހަމަޖެހިފައި ވަނީ މި މަހު 25 ވަނަ ދުވަހުއެވެ. ފައިނަލް މެޗު އޮންނާނީ 27 ވަނަ ދުވަހު އެވެ.
މި މުބާރާތުގެ ޗެމްޕިއަން ޓީމަށް 100،000ރ. ހުށަހަޅާފައިވާ އިރު، ރަނަރަފ ޓީމަށް 50،000ރ. ގެ ފައިސާގެ އިނާމު ދޭނެ އެވެ.
މީގެ އިތުރުން ތިން ވަނަ ޓީމަށް 25،000ރ. ފެއާޕްލޭ ޓީމަށް 10،000 ރުފިޔާ ދޭން ވަނީ ނިންމައިފައެވެ. އަދި މުބާރާތުގައި ބައިވެރިވާ ކޮންމެ ޓީމަކަށް 6،000 ރުފިޔާ ދިނުމަށް ވެސް އެސްޓީއޯއިން ވަނި ނިންމައިފަ އެވެ.
އެސްޓީއޯ ބަށިބޯޅަ މުބާރާތުގެ ވޭތުދިޔަ ހަތަރު އަހަރުގެ ޗެމްޕިއަނަކީ ފ. ފީއަލީ ޒުވާނުންގެ އެކުވެރި ކުލަބެވެ.