ހިތަދު އާއި މީދޫގައި އަޅާފައިވާ ފަތާ ޓްރެކް ސަރަހައްދުގައި އާންމުންގެ ފަސޭހައަކަށް ޗޭންޖިން ރޫމްތަކެއް ހަދަން ނިންމައި، އެ މަސައްކަތް ކުރާނެ ފަރާތެއް ހޯދަން އައްޑޫ ސިޓީ ކައުންސިލުން އިއުލާންކޮށްފި އެވެ.
ކައުންސިލުން ނެރުނު އިއުލާނުގައި ބުނީ ދެ އަވަށުގެ ފަތާ ޓްރެކް ސަރަހައްދުގައި ޗޭންޖިން ރޫމްތައް ހަދައި ދޭން ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 15 އާ ހަމައަށް ހުޅުވާލައިފައިވާ ކަމަށެވެ.
މިކަމާ ބެހޭ ގޮތުން މައުލޫމާތު ދިނުން އަންނަ މަހުގެ ފަސް ވަނަ ދުވަހު ހެނދުނު 11:00 ގައި ހިތަދޫގައި ހުންނަ ކައުންސިލް އިދާރާގައި އޮންނާނެ އެވެ.
ކައުންސިލުން ބުނީ މައުލޫމާތު ސާފު ކުރަން ނުދާ ފަރާތްތަކުގެ ޕްރޮޕޯސަލްތައް ބަލައި ނުގަންނާނެ ކަމަށެވެ.
ކައުންސިލުން ހަރަދުކޮށްގެން ހިތަދު އާއި މަރަދޫގައި ފަތާ ޓްރެކް އަޅައި، ބޭނުން ކުރަން ފަށާފައި ވަނީ މިދިޔަ އަހަރު އެވެ.
ކައުންސިލުން ބުނީ އަމާޒަކީ ޑިސެމްބަރު މަހު މަސް ނިމުމުގެ ކުރިން، ޗޭންޖިން ރޫމްތައް ހަދައި ބޭނުން ކުރަން ފެށުން ކަމަށެވެ.
މި ޗޭންޖިން ރޫމްތަކުގައި އަންހެނުންނާއި ފިރިހެނުންނަށް ވަކިން ހެދުން ބަދަލުކޮށް، ތާޒާ ފެނުން ފެންވެރޭނެ އިންތިޒާމް ހަމަޖެހިފައި ހުންނާނެ އެވެ.