ރާއްޖޭގައި އިންޖީނުލީ އުޅަނދުތައް އިތުރުވަމުންދާ ވަރަކަށް ވައި ނުސާފުވުމުގެ މައްސަލަވެސް ދަނީ ބޮޑުވަމުންނެވެ. އެހެންކަމުން ނުސާފު ވައިން ސަލާމަތްވުން ވަނީ ވަރަށް އުނދަގޫ ކަމަކަށްވެފަ އެވެ.
ބޮޑެތި މީހުންނަށް ވުރެ ވައިގެ ޒަރިއްޔާއިން ފެތުރޭ ބަލިތައް ކުޑަކުދިންނަށް ޖެހުމުގެ ފުރުސަތު ބޮޑެވެ. އެކުދިންގެ ގުނަވަންތައް ބޮޑެތި މީހުންނަށްވުރެ ނާޒުކުވުމުގެ ސަބަބުން އެކުދިންނަށް ސިއްޙީ މައްސަލަތައް ދިމާވުމަކީ ވަރަށް ގާތް ކަމެކެވެ.
1. ޓްރެފިކް ޖޭމްތަކާއި ދުރުހެލިވުން
ދިގު ޓްރެފިކްގައި ޖެހުމުން ދުރުހެލިވުމަށް މަސައްކަތް ކުރާށެވެ. އެފަދަ ހާލަތެއް މެދުވެރިވެއްޖެނަމަ، ކާރުގެ ކުޑަދޮރުތައް ލައްޕާލާށެވެ.
2. އައިނާއި އަވިއައިނު ބޭނުންކުރުން
މޫނާއި ލޯ ރައްކާތެރި ކުރުމަށްޓަކައި ރުމާލާއި އައިނުގެ ބޭނުން ކުރާށެވެ.
3. ޕޮލިއުޓެންޓްތަކުން ދުރުހެލިވުން
ސާފުތާހިރުވުމަކީ ވަރަށް މުހިންމު ކަމެކެވެ. އެހެން ނޫނީ ވައި ނުސާފުކޮށްދޭ މާއްދާތައް ހަށިގަނޑުގެ ތެރެއަށް ވަނުމުގެ ފުރުސަތު ބޮޑެވެ. އެހެންކަމުން އަބަދުވެސް ކުޑަކުދިން ފެންވަރުވައި، ދަތް އުނގުޅައި އަނގަ ސާފުކޮށް އަދި ބޭރުތެރޭގައި އުޅުމަށްފަހު ގެއަށް އައިސް ހެދުން ބަދަލު ކުރުމަށް ބާރުއަޅާށެވެ.
4. ނުސާފުވެފައިވާ ވައި ހުންނަ ސަރަހައްދުތަކަށް ނުދިއުން
ޖައްވުގައި ގިނައިން ދުން ހުންނަ ސަރަހައްދުތަކުގައި ކުޑަކުދިން ކުޅެ އުޅުމަށް ނުފޮނުވާށެވެ.
5. މާގިނައިން މީހުން އުޅޭ ސަރަހައްދުތަކަށް ނުދިއުން
އާބާދީ ބޮޑު ސަރަހައްދުތަކާއި، ހަލަބޮލި މަގުތަކުގައި ހިނގުމުން ދުރުހެލިވާށެވެ. ބަލިތަކުން ދުރުހެލި ކުރުމަށްޓަކައި ކުޑަކުދިން މާސްކް އެޅުމަށް އާދަކުރުވާށެވެ.
6. ނޭވާލުމުގެ ކަސްރަތުތައް ކުރުން
ކުޑަކުދިންނަށް ނޭވާލުމުގެ ކަސްރަތުތައް ކުރުމަށް ދަސްކޮށްދޭށެވެ. ސާފު، ފެހި ތިމާވެއްޓެއްގައި އެކަން ކުރުން އެންމެ އެދެވިގެން ވީނަމަވެސް، ގޭތެރޭގައި ކުރުމަކީވެސް ރަނގަޅު ކަމެކެވެ.
7. އެން95 ގެ މާސްކް ބޭނުންކުރުން
އެން95 އަކީ ވައިގެ ތެރެއަށް އުފަންވާ މާއްދާތައް ފިލްޓާކޮށްދޭ، ނޭވާލުމުގެ ނިޒާމު ރައްކާތެރިކޮށްދޭ އެއްޗެކެވެ. އަދި ހަމައެއާއިއެކު، ވައިގެ ތެރޭގައި ހުންނަ ކުޑަކުޑަ މާއްދާތައް ނޭވާލުމުގައި ހަށިގަނޑުގެ ތެރެއަށް ދިއުމުންވެސް ރައްކާތެރިކޮށްދެއެވެ.
8. އެންޓިއޮކްސިޑެންޓް ހުންނަ އެއްޗެހި ކެއުން
ދިރާސާތަކުން ދައްކާ ގޮތުގައި ވިޓަމިން ސީ މަދުން ހުރުމަކީ ނޭވާލުމުގައި މައްސަލަތައް ދިމާވެދާނެ ކަމެކެވެ. އެހެންކަމުން، ބެރީ، ޓޯމާޓޯ، ކެރޮޓް، ބްރޮކޮލީ، އާފަލު އަދި ޕްލަމްފަދަ ކުލަގަދަ ތަރުކާރީއާއި މޭވާތައް ކެއުމަކީ ރަނގަޅު ކަމެކެވެ. އެއީ އޭގައި ގިނަ އަދަދަކަށް އެންޓިއޮކްސިޑެންޓްތައް ހިމެނިގެންވާ އެއްޗެހިއެވެ.
9. ވައި ސާފުކޮށްދޭ ގަސްތައް ގަތުން
ދިރާސާތަކުން ދައްކާ ގޮތުގައި ބައެއް ކަހަލަ ވައި ސާފުކޮށްދޭ ގަސްތައް ގޭތެރޭގައި ބެހެއްޓުމަކީ ވަރަށް ފައިދާހުރި ކަމެކެވެ. އެފަދަ ގަސްތަކުގެ ތެރޭގައި އެރީކާ ޕާމް ޓްރީ، މަދާ އިން ލޯސް ޓަންގް އަދި މަނީ ޕްލާންޓް ހިމެނެއެވެ.
10. އިންޑޯ އެއާ ޕިއުރިފަޔާއެއް ގަތުން
އެއާ ޕިއުރިފަޔާތަކަކީ ވައިގެ ތެރޭގައި ހުންނަ މައިކްރޯންތައް ނައްތާލައި، 99.9 އިންސައްތައަށް ހިރަފުސް މަދުކޮށްދޭ، ވައި ސާފުކުރާ ޑިވައިސްއެކެވެ. އަބަދުވެސް ގޭގައި ހުންނަ އޭސީތަކާއި ވެންޓިލޭޓަރުތަކުގެ ފިލްޓާތައް ސާފުކޮށްފައި ބަހައްޓާށެވެ. އެހެން ނޫންނަމަ، އޭގައި ހިރަފުސް ހަރުލާނެއެވެ.