ކުރީގެ ރައީސް ޑރ މުހައްމަދު ވަހީދު ހަސަން މަނިކުގެ ބަޔޮގްރަފީ "އިންސާފު: ރައީސް ވަހީދުގެ ހަޔާތުން" ރޭ ނެރެފި އެވެ.
ހޮޓެލް ޖެންގައި ބޭއްވި ހާއްސަ ރަސްމިއްޔާތެއްގައި އެ ފޮތް ނެރެދެއްވީ ރައީސް ޑރ ވަހީދުގެ ވެރިކަމުގައި އެމަނިކުފާނުގެ ސަރުކާރުގެ ނައިބު ރައީސްކަން ކުރެއްވި މުހައްމަދު ވަހީދުއްދީނާއި ރައީސް ވަހީދުގެ ދެ ބޭފުޅުން ކަމަށްވާ ފިދާ ވަހީދާއި އިސްމާއީލް ޖެފްރީ ވަހީދެވެ.
"އިންސާފު: ރައީސް ވަހީދުގެ ހަޔާތުން" ލިޔުއްވާފައި ވަނީ ރާއްޖޭގެ ތަޖުރިބާކާރު ނޫސްވެެރިއެއް ކަމަށްވާ މުހައްމަދު ޖަމީލެވެ.
ބައޮގްރަފީ ނެރުމުގެ ރަސްމިއްޔާތުގައި ޑރ ވަހީދު ވިދާޅުވީ އެމަނިކުފާނުގެ ހަޔާތުގެ މައްޗަށް ލިޔެވި، ޝާއިއު ކުރެވިގެން މިދިޔަ ފޮތުގައި އެ މަނިކުފާނުގެ ހަޔާތުގައި ހިނގަފައިވާ މުހިއްމު ކަންތައްތަކުގެ ވާހަކަ ހިމެނިފައިވާނެ ކަމަށެވެ.
Happy to have my biographical account "Insaaf" released tonight. pic.twitter.com/OPdhRZRxB3
— Mohamed Waheed (@DrWaheedH) November 25, 2016
އޭގެ ތެރޭގައި އެމަނިކުފާނުގެ ރިޔާސީ ދައުރުގެ ފުރަތަމަ ދުވަހާއި ފަހު ދުވަހު ހިނގައި ދިޔަ މުހިއްމު ކަންތައްތަކުގެ ވާހަކަ ވެސް ހިމެނޭނެ ކަމަށް ވިދާޅުވިއެވެ.
މީގެ އިތުރުން އެމަނިކުފާނު ރައީސް މުހައްމަދު ނަޝީދުގެ ރަނިންމޭޓަކަށް ހަމަޖެހިގެން ދިޔަ ގޮތާއި، ރައީސް ނަޝީދުގެ ވެރިކަމުގައި ކުރިމަތިވެވަޑައިގެން ވަރަށް ގިނަ ގޮންޖެހުންތަކެއް ފޮތުގައި ބަޔާންކޮށްފައިވެ އެވެ.
ޑރ. ވަހީދުގެ ބައޮގްރަފީ އާ ބެހޭ ގޮތުން އޭގެ މުސައްނިފް ޖަމީލް ވިދާޅުވީ "އިންސާފު: ރައީސް ވަހީދުގެ ހަޔާތުން" މި ފޮތް މިއަދުން ފެށިގެން ހުރިހާ ފޮތް ފިހާރަތަކުން ގަންނަން ލިބޭނެ ކަމަށެވެ.