އެލައިޑް އިންޝޫރަންސް އިން "ކަމަނަ" ގެ ނަމުގައި އަންހެނުންނަށް ހާއްސަ އިންސުރެންސް ޕްލޭނެއް ތައާރަފްކޮށްފި އެވެ.
ރޭ ދަރުބާރުގޭގައި ބޭއްވި ރަސްމިއްޔާތެއްގައި އެ ހިދުމަތް ތައާރަފުކޮށް ދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
"ކަމަނަ" އާ ބެހޭ ގޮތުން އެލައިދްގެ މެނޭޖަ ލައިފް އިންޝުއަރެންސް ޝްރިނާވަޝަން ރާމަކްރިޝްނާ ވިދާޅުވީ މި އިންޝުއަރެންސް ޕްލޭނަކީ އަންހެނުން ބާރުވެރި ކުރުވުމުގެ ގޮތުން ތައާރަފް ކުރެވުނު ޕްލޭނެއް ކަމަށެވެ. އަދި މި ޕްލޭންގެ ދަށުން އަންހެނުންނަށް ވަަރަށް ގިނަ ގުނަ ފައިދާތަކެއް ލިބިގެން ދާނެ ކަމަށް ވިދާޅުވި އެވެ.
"ކަމަނަ" އަކީ އަންހެން ކަނބަލުންނަށް މުޅިން ހާއްސަކޮށް ތައާރަފް ކުރި އެލައިޑްގެ ފުރަތަމަ ޕްލޭނެވެ.
މި ޕްލޭންގައި އުމުރުން 18-48 އަހަރުގެ ކޮންމެ އަންހެނަކަށް ވެސް ބައިވެރިވޭނެ އެވެ. މި ސްކީމުގެ ދަށުން އެންމެ ކުޑަކޮށް އިންޝުއަކޮށްދޭ އަގަކީ 50،000ރ. އެވެ.
"ކަމަނަ" ޕްލޭންގެ ދަށުން ކުއްލި ހާލަތުގެ ފަންޑު ލިބުމާއި، ބޮޑެތި ބަލިތަކަށް ފަރުވާ ކުރުވުމާއި، ދާއިމީ ނުކުޅެދުންތެރިކަމެއް ކުރިމަތިވުމުން ފައިސާ ލިބުމުގެ އިތުރުން އިތުރު ފައިދާތަކެއް ވެސް ލިބިގެން ދާނެ ކަމަށް އެލައިޑުން ބުންޏެވެ.