ސްއެމްޑީޕީފެ ޗެއާޕާސަންގެ މަގާމުގައި ހުންނެވި އަދި މިހާރު އިނގިރޭސިވިލާތުގައި ދިރިއުޅުއްވަމުން ގެންދަވާ އަލީ ވަހީދު މަގާމުން އިސްތިއުފާ ދެއްވާފައިވާތީ ޗެއާޕާސަންގެ މަޤާމަށް ކުރިމަތިލެއްވުމަށް ޤާނޫނީ ވަކީލް އަދި އެމްޑީޕީ ޤައުމީ މަޖިލީހުގެ މެމްބަރު ހަސަން ލަތީފް ނިންމަވައިފި އެވެ.
ހަސަން ވިދާޅުވީ އެމްޑީޕީގެ ޗެއާޕާސަންކަމަށް ކުރިމަތިލައްވަނީ އެ މަޤާމުގެ މަސްއޫލިއްޔަތުތައް އަދާ ކުރެވޭނެ ކަމަށް ގަބޫލުކުރައްވާތީ ކަމަށެވެ.
އޭނާ ވިދާޅުވީ ރާއްޖޭގެ ސިޔާސީ މަޝްރަހު ހަލަބޮލި މި ދަނޑިވަޅުގައި ގިނަ މަސައްކަތްތަކެއް ކުރަންޖެހިފައިވާ ކަމަށެވެ.
އެގޮތުން ސަރުކާރު ޒިންމާދާރު ކުރުމަށާއި، ސަރުކާރު ޖަވާބުދާރީ ކުރުމަށް ގިނަ މަސައްކަތްތަކެއް ކުރަން ޖެހިފައިވާ ކަމަށް ހަސަން ވިދާޅުވި އެވެ.
އޭނާ ވިދާޅުވީ ޗެއާޕާސަންގެ މަޤާމަށް އިންިތހާބުވެވަޑައިގެންފިނަމަ އެންމެ އިސްކަމެއް ދެއްވާނީ ކުރިއަށް އޮތް ލޯކަލް ކައުންސިލް އިންތިހާބު ކާމިޔާބުގައި އެމްޑީޕީން ކާމިޔާބު ހޯދުމަށް ކަމަށެވެ. އަދި އިންތިހާބު ކާމިޔާބު ކުރުމަކީ ސަރުކާރު ޖަވާބުދާރީ ކުރުމަށް ވެސް ވަރަށް މުހިންމު ކަމެއް ކަމަށް އޭނާ ވިދާޅުވި އެވެ.
އަލީ ވަހީދު ޗެއަޕާސަންގެ މަޤާމުގެ އިތުރަށް މޯލްޑިވްސް ޔުނައިޓެޑް އޮޕޮޒިޝަން (އެމްޔޫއޯ) އިން އިސްތިއުފާ ދެއްވައި، ޕާޓީގެ ރައީސް މުހައްމަދު ނަޝީދަށް ފޮނުއްވި ސިޓީގައި ވިދާޅުވެވީ އެ ދެ މަގާމުން އިސްތިއުފާ ދެއްވީ އަމިއްލަ ވަޒަނުން އަރުވާލެވި، ބޭރު ގައުމެއްގެ ހިމާޔަތުގައި ހުންނަވައި، އިތުރަށް މަގާމު ދެމެހެއްޓުމަށް ވުރެ، ޕާޓީ އާއި ރާއްޖޭގެ ހާލަތަށް ބަލައި، ރާއްޖޭގައި ދިރިއުޅޭ މީހުންނަށް އެ ޕާޓީއަށް ހިދުމަތް ކުރުމުގެ ފުރުސަތު ދިނުމުގެ ގޮތުން ކަމަށެވެ.