1. ކާއެއްޗެހި ހަޖަމްކުރުން
ފަޅޮލުގައި ހިމެނިގެންވާ އެންޒައިމް ޕަޕައިން އަކީ ޕްރޮޓީންތައް ހަޖަމްކޮށްދޭ އެއްޗެކެވެ. އެހެންކަމުން ހަޖަމްކުރުމުގެ ނިޒާމަށް ޖެހޭ މައްސަލަތަކާއި ބަނޑުހަރުވުމުގެ މައްސަލަތަކަށް ހައްލެއް ހޯދުމުގެ ގޮތުން ފަޅޯ ޖޫސް ބުއިމަކީ ރަނގަޅު ކަމެކެވެ.
2. އެންޓި-އިންފްލެމޭޓަރީ
ޕަޕައިންގެ އިތުރުންވެސް ފަޅޮލުގައި އިންފްލެމޭޝަން(ދުޅަވުން) އާއި ދެކޮޅަށް މަސައްކަތް ކުރާ ވަރަށް ގިނަ އެންޒައިމްތައް ހުރެއެވެ. އަދި އަނދާފައި ހުންނަ ތަންތަންވެސް އަވަހަށް ރަނގަޅު ކޮށްދެއެވެ.
3. ހިތުގެ ބަލިތަކާއި ކެންސަރު
ފަޅޮލަކީ އެންޓިއޮކްސިޑެންޓްތަކާއި ފައިޓޯނިއުޓްރިއެންޓްތަކުން ފުރިގެންވާ މޭވާއެވެ. އެމާއްދާތަކަކީ ފްރީ ރެޑިކަލްސްއާއި ދެކޮޅަށް މަސައްކަތް ކުރާ މާއްދާތަކަށް ވުމުން، ހިތުގެ ބަލިތަކާއި ކެންސަރު ޖެހުމުން ހަށިގަނޑު ދިފާޢު ކޮށްދޭ އެއްޗަކަށް ފަޅޯ ވެގެންދެއެވެ.
4. ހަކުރުބަލި
ގިނަ ދިރާސާވެރިން ހޯދާފައިވާ ހޯދުންތަކުން ދައްކާ ގޮތުގައި ރޯފަޅޯ ކެއުމުން ލޭގައި ހަކުރާއި ކޮލެސްޓްރޯލް ހުންނަ މިންވަރު ހިފަހައްޓައިދެއެވެ. އެއީ ފަޅޮލުގައި ގިނަ އަދަދަކަށް ފައިބަރު ހިމެނިގެން ވާތީއެވެ. މޮރީޝަސް ޔުނިވާސިޓީގެ ސެންޓާ ފޯ އެކްސެލެންސް ފޯ ބައޯމެޑިކަލް އެންޑް ބައޯމެޓީރިއަލްސް ރިސާޗުއިން ހެދި ދިރާސާއަކުން ދެއްކި ގޮތުގައި ގްރީން ޓީއާއި ފަޅޮލަކީ، އެއްކޮށްގެން ބޭނުންކޮށްފިނަމަ ހަކުރު ބަލި ރަނގަޅުކޮށްދޭ އެއްޗެއް ކަމަށެވެ. އިންޑިއާގެ ބައެއް ސަރަހައްދުތަކުގައި ފަޅޯ މަލަކީ ހަކުރު ބަލިން ރައްކާތެރިވުމުގެ ގޮތުން ބޭނުންކުރާ އެއްޗެކެވެ. ހިތި ރަހަދޭ އެމާތައް އިންޑިއާގެ މީހުން ބޭނުންކުރަނީ ކުޑަ ތެޔޮފޮދެއްގައި ތެލުލައިގެން، ބަތާއިއެކު އެވެ.
5. ދިފާޢީ ބާރު
ފަޅޮލަކީ ވިޓަމިން އޭ، ބީ، ސީ އަދި ކޭ ގިނަ އަދަދަކަށް އެކުލެވިގެންވާ މޭވާއެކެވެ. އަދި އެއީ ދިފާޢީ ބާރު އިތުރުކޮށްދޭ އެއްޗެއްވެސް މެއެވެ. ފަޅޮލަކީ އިސްތަށްޓާއި ހަންގަނޑުގައި ހުންނަ ޓިށޫތައް ހެދިބޮޑުވުމަށް ވަރަށް ފައިދާހުރި އެއްޗެކެވެ. އަދި ހަމަ އެހެންމެ ފަޅޮލަކީ ކަނެކްޓިވް ޓިޝޫތަކުގެ އެންމެ މައި ޕްރޮޓީން ކަމަށްވާ ކޮލާޖެން ހިފަހައްޓައި ދިނުމަށް އެހީވެދޭ މޭވާއެކެވެ. މެދު ސައިޒުގެ ފަޅޮލެއް ކޮންމެ ދުވަހަކު ކާނަމަ، ހަށިގަނޑަށް ދުވާލަކު ބޭނުންވާ ވަރަށްވުރެ ދެގުނަ އިތުރަށް ވިޓަމިންސް ލިއްބައިދޭނެއެވެ.
6. ސާފުކުރުން
މާހިރުން ލަފާއަރުވާ ގޮތުގައި ހަންގަނޑު ޤުދުރަތީ ގޮތުން ސާފުކުރުމަށްޓަކައި ފަޅޯ ބޭނުން ކުރެވިދާނެއެވެ. އެއީ އޭގައި ހުންނަ އެކްޓިވް އެންޒައިމްތަކަކީ ހަންގަނޑުގައި ހުންނަ މިލަތަކާއި ޖަރާސީމުތައް ނައްތާލަދޭ އެއްޗަކަށް ވާތީއެވެ.
7. އާތްރައިޓިސް (ހުޅުހުޅުގައި ރިއްސުން)
ފަޅޮލަކީ އޭގައި ކެލްސިއަމް، ޕޮޓޭސިއަމް، މެގްނީސިއަމް އަދި ކޮޕާ ފަދަ މިނަރަލްތައް އެކުލެވިގެންވާ މޭވާއެކެވެ. އެހެންކަމުން ޤަވާއިދުން ފަޅޯ ކެއުމަކީ ހަށިގަނޑުގައި ކެލްސިއަމް ހުންނަ މިންވަރު އިތުރު ކޮށްދޭ ކަމެކެވެ. އަދި ދުރު މުސްތަޤުބަލުގައި އެއީ ހުޅުހުޅުގައި ރިއްސުމުން ރައްކާތެރި ކޮށްދޭ ކަމެކެވެ.
8. ޑެންގީ
ހަށިގަނޑުގައި ޕްލޭޓްލެޓް ހުންނަ މިންވަރު އިތުރު ކުރުމަށްޓަކައި ޑެންގީގެ ފަރުވާއެއްގެ ގޮތުގައި އާންމުކޮށް ފަޅޯ ގަހުގެ ފަތް ބޭނުން ކުރެއެވެ. ބެންގަލޫރުގެ ނިއުޓްރިޝަނިސްޓެއް ކަމަށްވާ ޑރ. އަންޖޫ ސޫދް ވިދާޅުވާ ގޮތުގައި ޑެންގީއަކީ ލޭގައި ޕްލޭޓްލެޓް ހުންނަ މިންވަރު ވަރަށް ބޮޑަށް ދަށްކޮށްދޭ އިންފެކްޝަނެކެވެ. އެންމެ ފަސޭހައިން ޕްލޭޓްލެޓް ކައުންޓް އިތުރު ކުރެވޭނެ ގޮތަކީ ބަލިމީހާއަށް ފަޅޯ ފަތުގެ ޖޫސްތަށްޓެއް ދިނުމެވެ. އެފަނި ތައްޔާރު ކުރާނީ ފަޅޯ ފަތް ފެނާއި އެއްކޮށްގެން ފުނޑާލައިގެންނެވެ. އެހެންނަމަވެސް، ޑެންގީ އަކީ ޑެންގީ ހެމޮރޭޖިކް ފީވާއަށް ބަދަލުވެއްޖެނަމަ، ހަށިގަނޑުގައި ލޭދައުރުވާ ނިޒާމް މުޅިން ބަންދުކޮށް، ފުރާނައަށް ގެއްލުން ކުރުވަނިވިފަދަ ބައްޔެކެވެ.
9. ބަރުދަން ލުއިކުރުން
ފަޅޮލަކީ އެހާގިނައިން ކެލޮރީސް ހިމެނިގެންވާ މޭވާއެއް ނޫނެވެ. އެހެންކަމުން ހެނދުނުގެ ނާސްތާގައި ފަޅޯ ކެއުމަކީ ވަރަށް ރަނގަޅު ކަމެކެވެ. 140 ގްރާމް ފަޅޮލުގައި ހުންނަނީ އެންމެ 60 ކެލޮރީއާއި، 0.4 ގްރާމް ފެޓް، 15.7 ގްރާމް ކާބޯހައިޑްރޭޓް އަދި 2.5 ގްރާމް ފައިބާއެވެ. ފަޅޮލުގައި ކޮލެސްޓްރޯލް ނުހުރެއެވެ.