ރައީސް އަބްދުﷲ ޔާމީންގެ ސަރުކާރުން ރައްޔިތުންނަށް އޮޅުވާލާ، މި ސަރުކާރުގެ ޕްރޮޕެގެންޑާ ފެތުރުން ނޫން އެއްވެސް ކަމެއް ނުކުރާކަަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަލީ ނިޒާރު ރޭ ވިދާޅުވެއްޖެ އެވެ.
ރޭ އެމްޑީޕީ ހަރުގޭގައި އޮޔް "ހަރުގެ ޖަލްސާ" ގައި އޭނާ ވިދާޅުވީ ސަރުކާރުން ދަނީ ރައްޔިތުންނަށް އޮޅުވާލައި، ތަރައްގީގެ ނަމުގައި އަމިއްލަ ޕްރޮޕެގެންޑާ ފަތުރަމުން ކަމަށެވެ.
ނިޒާރު ވިދާޅުވީ ދައުލަތުގެ ބަޖެޓުގައި ބޮޑެތި އަގުތައް ޖަހައި، ތަރައްގީގެ މަޝްރޫއުތައް ފެށުމަށް ކަމަށް ބުނެ ގެންދަނީ ރައްޔިތުންނަށް އޮޅުވާލަމުން ކަމަށެވެ.
އޭނާ އަދި ވިދާޅުވީ ރައްޔިތުންގެ އަސާސީ ކަންކަން ކޮށް ދިނުމުގެ ބަދަލުގައި ދައުލަތުގެ ބަޖެޓުން ބޭކާރު ހަރަދުތަކެއް ކުުރުމަކީ ގައުމު އާރާސްތު ކުުރުން ނޫން ކަމަށެވެ.
އަދި މިފަދަ ކަންކަމަކީ ޑިމޮކްރެޓިކް ގައުމުތަކުގައި ކުރާ ކަންތައްތައްތަކެއް ނޫން ކަމަށާއި އެއީ ހުދުމުހުތާރު ސިޔާސަތުތަކެއް ކަމަށް ވެސް ވިދާޅުވި އެވެ.
"މިއީ ކިޔުބާއިން ވެނެޒުއޭލާއިން ރަޝިޔާއިން އަޅުގަނޑުމެނަށް ފެންނަ މަންޒަރުތައް،" ނިޒާރު ވިދާޅުވި އެވެ. "މިއީ ޑިމޮކްރެޓިކް މުޖުތަމައުތަކުގައި ކަން ހިނގަންޖެހޭ ގޮތެއް ނޫން."
އޭނާ ވިދާޅުވީ ސިޔާސީ ވާދަވެރި ކަމަކީ އޮންނަން ޖެހޭ އެއްޗެއް ކަމަށާއި އެއީ ހިމާޔަތް ވެސް ކުރަން ޖެހޭ އެއްޗެއް ކަމަށެވެ.
އެކަމަކު ރައީސް ޔާމީންގެ ވިސްނުންފުޅު ހުރީ މުޅިން އެހެން ގޮތަކަށް ކަމަށާއި އެމަނިކުފާނު މަސައްކަތް ކުރައްވަމުން ގެންދަވަނީ ސިޔާސީ ހުރިހާ ވާދަވެރިން ނައްތާލައި، އެ މީހުންނަށް ނުހައްގުން އަނިޔާ ދިނުމަށް ކަމަށް ވިދާޅުވި އެވެ.