ހަމައެކަނި މޭވާ އާއި ތަރުކާރީގެ ބާވަތްތަަކަށް ހާއްސަ ފިހާރައެއް ފޭދޫގައި ހުޅުވައިފި އެވެ.
"ފްރެޝް ސިޓީ" ގެ ނަމުގައި ހުޅުވާފައިވާ މި ފިހާރަ ހުންނަނީ ފޭދޫ ބޮޑު މަގުގައި ފޭދޫ ސްކޫލް ކައިރީގަ އެވެ.
އެ ފިހާރައިން ބުނީ ތާާާޒާ މޭވާ އާއި ތަރުކާރީގެ ވަރަށް ގިނަ ބާވަތްތަކެއް، އަތްފޯރާ ފަށުގައި ގަންނަން ލިބޭނެ ކަމަށެވެ.
އެތަނުން ވިއްކާ ބާވަތްތަކުގެ ތެރޭގައި ރާއްޖޭގައި ހައްދާ ބާވަތްތަކާއި ރާއްޖޭން ބޭރުން އިމްޕޯޓް ކުރާ ބާވަތްތައް ވެސް ހިމެނެ އެވެ.
"ފްރެޝް ސިޓީ" އިން ބުނީ މޭވާ އާއި ތަރުކާރީ އަށް ހާއްސަ ފިހާރައެއް ހުޅުވުމުން، އެ ބާވަތްތައް ތާޒާކޮށް ހޯދަން ބޭނުންވާ އާންމު ރައްޔިތުންނަށާއި ކެފޭ/ރެސްޓޯރަންޓް ފަދަ ތަންތަން ހިންގާ މީހުންނަށް ވެސް ތާޒާ މޭވާ އާއި ތަރުކާރީ ގަންނަން ފަސޭހަކަމާ އެކު ލިބޭނެ ކަމަށެވެ.
އެތަނުން ބުނީ އަމާޒަކީ އަބަދު ވެސް ބާވަތްތައް ހުސްނުވާނެހެން ކަސްޓަމަރުންނަށް ލިބޭނެ ގޮތް ފަހިކޮށް ދިނުން ކަމަށެވެ.
އެގޮތުން "ފްރެޝް ސިޓީ" އިން މިހާރު ވަނީ ގަމަށް ފެށި ސްރީ ލަންކަން އެއާލައިންސުން ތަރުކާރީ އާއި މޭވާ ގެންނަން ފަށައިފަ އެވެ.
އެތަނުން ބުނީ އައްޑު އަށް ލަންކާ އިން ސީދާ ދަތުރުތައް ބޭއްވުމަކީ އެ މީހުންގެ ވިޔަފާރި އަށް ލިބުނު ވަރަށް ބޮޑު ކުރިއެރުމެއް ކަމަށެވެ.
މީގެ ކުރިން މަރަދޫގައި ވެސް ހަމައެކަނި ތަރުކާރީ އާއި މޭވާ އަށް ހާއްސަ ފިހާރައެއް ހުޅުވި އެވެ. އެކަމަކު މާ ގިނަ ދުވަސްތަކެއް ނުވެ އެ ފިހާރަ ވަނީ ބަންދުކޮށްފަ އެވެ.