ސަންޖޭ ދަތުގެ ހަޔާތުގެ މައްޗަށް ބިނާކޮށް ހަދާ ފިލްމުގައި ސަންޖޭގެ ރޯލް ކުޅޭނީ ރަންބީރު ކަޕޫރްކަމާ ދޭތެރޭ މިހާރު އެއްވެސް ޝައްކެއް ނެތެވެ.
އެކަަމަކު މި ފިލްމުގެ އެހެން ކާސްޓުންނާ ބެހޭ ގޮތުން އަދިވެސް ބޮޑަަށް އިވެނީ ތުންތުންމަތިން ދެކެވޭ ވާހަކަތަކެވެ. ފިލްމާ ގުޅުން ހުރި ރަސްމީ އެއްވެސް ފަރާތަކުން ފިލްމުގެ މައިގަނޑު ކާސްޓާ ބެހޭ ގޮތުން އެއްވެސް ވާހަކައެއް މިހާތަނަކަށް ނުދައްކަ އެވެ.
ރާޖްކުމާރު ހިރާނީ ޑައިރެކްޓް ކުރާ މި ފިލްމުގައި ރަންބީރުގެ މަންމަގެ ރޯލް ކުޅޭނީ ތައްބޫ ކަމަށް މިހާރު ވަނީ އަޑުތައް ފެތުރިފަ އެވެ. އޭގެ މާނައަކީ ތައްބޫ ކުޅޭނީ ސަންޖޭގެ މަންމަ ނަރްގިސްގެ ރޯލެވެ.
މީގެ އިތުރުން ރަންބީރުގެ ބައްޕަގެ ރޯލް ކުޅޭނީ އަކްޝަޔޭ ކަންނާ ކަމަށްވެ އެވެ. އެއީ ސަންޖޭގެ ބައްޕަ ސުނިލް ދަތުގެ ރޯލެވެ. އެ ރޯލް އަކްޝަޔޭ ކުޅޭ ނަމަ އެކަން ވެގެން ދާނީ ފިލްމެއްގައި ޒުވާން އެކްޓަރެއްގެ ބައްޕައެއްގެ ރޯލުން އޭނާ ފެނިގެންދާ ފުރަތަމަ ފަހަރަަށެވެ.
ތައްބޫ މީގެ ކުރިން ވަނީ ޒުވާން އެކްޓަރުންތަކެއްގެ މަންމަގެ ރޯލް ކުޅެފަ އެވެ. އެއީ "ފިތޫރް ގައި ކެޓްރީނާ ކެއިފްގެ މަންމަގެ ރޯލާއި "ހައިދަރު" ގައި ޝާހިދު ކަޕޫރުގެ މަންމަގެ ރޯލެވެ.
މި އަޑުތައް ފެތުރުނު ނަމަވެސް މިކަމާ ބެހޭ ގޮތުން ތައްބޫ ވެސް އަދި އަކްޝަޔޭ ވެސް އެއްވެސް ވާހަކައެއް ނުދައްކަ އެވެ.
ރިޕޯޓްތައް ބުނާ ގޮތުން ސަންޖޭގެ ބައޮޕިކްގައި، ރަންބީރުގެ ލޯބިވެރިއެއްގެ ރޯލުން ސޯނަމް ކަޕޫރު ވެސް ފެނިގެން ދާނެ އެވެ.