އައްޑޫގެ މިސްކިތްތަކުގެ އިމާމުން ހިމެނޭ ގޮތަށް އިމާމުން ތަމްރީނު ކުރަން މައްކާ އަށް ފޮނުވުމަށް ތައްޔާރުވަމުން އަންނަ ކަމަށް އިސްލާމިކް މިނިސްޓްރީން ބުނެފި އެވެ.
އެ މިނިސްޓްރީން ބުނީ އިމާމުންގެ ގޮތުގައި މިހާރު ޚިދުމަތުގައި ތިބި އިމާމުން ޑިޕްލޮމާ ފެންވަރަށް ތަމްރީނުކޮށް، އިމާމުން އުފެއްދުމަށް އަންނަ އަހަރު ޚާއްސަ މަސައްކަތްތަކެއް ކުރަން ނިންމަވާފައިވާ ކަމަށެވެ.
އިމާމުން ތަމްރީން ކުރުމުގެ ޕްރޮގްރާމް ކުރިއަށް ގެންދަން ހަމަޖެހިފައިވަނީ މައްކާގެ އުއްމުލް ޤުރާ ޔުނިވަސިޓީ އާއި އިސްލާމިކް މިނިސްޓްރީ ގުޅިގެންނެވެ.
އެ މިނިސްޓްރީން ބުނީ އިމާމުން ތަމްރީން ކުރުމުގެ ފުރަތަމަ ބެޗްގައި ހިމެނޭ އިމާމުން މައްކާ އަށް ފުރުމަށް ވާން ޖެހޭ ތައްޔާރީތައް ކުރަމުން އަންނަ ކަމަށެވެ.
ތަމްރީނަށް މައްކާ އަށް ފޮނުވާ އިމާމުންގެ ފުރަތަމަ ބެޗުގައި ހިމެނެނީ އައްޑު އާއި ފުވައްމުލަކާއި މާލޭގެ މިސްކިތްތަކުގައި މަސައްކަތްކުރާ އިމާމުންނެވެ.
އިސްލާމިކް މިނިސްޓްރީން ބުނީ އިމާމުން ތާޒާ ކުރުމުގެ ޕްރޮގްރާމާއި، ވާއިޒުން ތަމްރީނު ކުރުމަށް މިސްރުގެ އަޒްހަރު ޔުނިވަސިޓީ އަށް ވެސް ފޮނުވުމަށް ނިންމަވާފައިވާ ކަމަށެވެ.
މި ތަމްރީނު ޕްރޮގްރާމްގައި 50 އިމާމުން ބައިވެރި ކުރާނެ އެވެ.
އިސްލާމިކް މިނިސްޓްރީ އާއި ގައުމީ ޔުނިވަސިޓީ ގުޅިގެން ކުރިއަށް ގެންދަވާ އިމާމުންގެ ޑިޕްލޮމާ ކޯހުގައި މިހާރު ވެސް 25 އިމާމަކު ތަމްރީނު ހަދަމުން ދެ އެވެ.
މުޅި ރާއްޖޭގައި މިހާރު 500 އަށްވުރެ ގިނަ އިމާމުން އެބަ ތިއްބެވެ.