ޕްރަބޫ ދޭވާގެ ކުރިއަށް އިތް ފިލްމް "ލެފްޓީ" ގެ ލީޑް ރޯލަށް އަބިޝެކް ބައްޗަން ހަމަޖައްސައިފި އެވެ.
ސައިންސް ފިކްޝން ތުރިލާއެއްގެ ގޮތުގައި ގެނެސްދޭ މި ފިލްމުގެ ސްކްރީންޕްލޭ ލިޔެފައި ވަނީ ސަލްމާން ހާންގެ ކޮމެޑީ ފިލްމް "ރެޑީ" ގެ ސްކްރީންޕްލޭ ލިޔުނު ކޯނާ ވެންކޮޓް އެވެ. މިއީ މީގެ ތިން އަހަރު ކުރިން ލިޔެފައިވާ ސްކްރިޕްޓެކެވެ.
"ލެފްޓީ" އާ ބެހޭ ގޮތުން ޕްރަބޫ ދޭވާ ބުނީ އޭގެ ނެރޭޝަން އަޑު އަހާފައި ސްކްރިޕްޓް އަބިޝެކަށް ކަމުދިޔަލެއް ބޮޑުކަމުން، ވަގުތުން ފިލްމަށް އެއްބަސްވި ކަމަށެވެ.
މި ފިލްމް މިހާރު ހަމަޖެހިފައި އޮތް ގޮތުން ނަމަ، އަބިޝެކް ހަމައެކަނި ފިލްމުގެ ލީޑް ރޯލުން ފެންނާނީކީ ނޫނެވެ. "ލެފްޓީ" ޕްރޮޑިއުސް ކުރަނީ އޭނާގެ އާއިލީ ފިލްމް ކުންފުނި އޭބީ ކޯޕަރޭޝަން ޕްރޮޑަކްޝަނުންނެވެ.
ޕްރަބޫ ދޭވާ ބުނީ ފިލްމުގެ މަސައްކަތް އަންނަ އަހަރުގެ ކުރީކޮޅު ފަށާނެ ކަމަށެވެ. އެކަމަކު އޭގެ ކުރިން "ލެފްޓީ" ގައި އަބިޝެކް ކުޅޭ ރޯލަށް އޭނާގެ ހަށިގަނޑަށް ބޮޑެތި ބަދަލުތަކެއް ގެންނަން ޖެހެ އެވެ.
އެހެންވެ މި ފިލްމްވެގެން ދާނީ އަބިޝެކް ވަރަށް ތަފާތުކޮށް ފެނިގެން ދާނެ ފިލްމެއް ކަަމަށް ބެލެވެ އެވެ.
އަބިޝެކް އެންމެ ފަހުން ފެނިގެން ދިޔައީ މި އަހަރު ރިލީޒްވި "ހައުސްފުލް 3" އިންނެވެ.
"ވޯންޓެޑް" އާއި "ރައުޑީ ރާތޯޑް" ފަދަ ފިލްމްތައް ޑައިރެކްޓްކޮށްފައިވާ ޕްރަބޫ ދޭވާ އެންމެ ފަހުން ޑައިރެކްޓް ކުރީ އަޖޭ ދޭވްގަން ލީޑް ރޯލުން ފެނިގެން ދިޔަ 2014 ގެ "އެކްޝަން ޖެކްސަން" އެވެ.