ގަން އިންޓަނޭޝަނަލް އެއާޕޯޓާއި ކޮލޮމްބޯ އާ ދެމެދު ޝެޑިއުލް ދަތުރުތައް ފަށާފައިވާތީ ދެކުނުގެ އަތޮޅުތަކުގެ އެއާޕޯޓްތަކުން ގަމަށް ދަތުރު ކުރެވޭނެ އިންތިޒާމުތަކެއް ހަމަޖައްސަމުން އަންނަ ކަމަށް ގައުމީ އެއާލައިން މޯލްޑިވިއަނުން ބުނެފި އެވެ.
މޯލްޑިވިއަން ހިންގާ އައިލެންޑް އޭވިއޭޝަން (އައިއޭއެސް) އިން ބުނީ ސްރީ ލަންކަން އެއާލައިންސް އިން ގަަމަށް އިންޓަނޭޝަނަލް ފްލައިޓުތައް ފަށާފައިވާ އިރު، ދެކުނުގެ އަތޮޅުތަކުގައި ދިރިއުޅޭ ފަރާތްތަކަށް ފަސޭހަ އިން ގަމަށް ދެވޭނެ އިންތިޒާމެއް އޮންނަން ޖެހޭނެ ކަމަށެވެ.
އެހެންވެ ގދ. ކާޑެއްދޫ އަދި ގއ. ކޫއްޑޫ އެއާޕޯޓާއި ގަމާ ދެމެދު ދަތުރުތައް ފަށަން ނިންމާފައިވާ ކަމަށް އެ ކުންފުނިން ބުންޏެވެ.
އައިއޭއެސް އިން ބުނީ އެ އެެއާޕޯޓްތަކުން ގަމަށް ދަތުރުތައް މި މަހުގެ ފަހުކޮޅު ނޫނީ އަންނަ މަހު ކުރީކޮޅު ފެށޭނެ ކަމަށެވެ.
ކޮލޮމްބޯ އާއި ގަމާ ދެމެދު ދަތުރުތައް ފެށީ ބުރާސްފަތި ދުވަހު އެވެ.
އެގޮތުން ހަފުތާއަކު ހަތަރު ފްލައިޓް ބާއްވާނެ އެވެ. އެއީ ބުރާސްފަތި، ހުކުރު، ހޮނިހިރު އަދި ހޯމަ ދުވަހު އެވެ.