ގަމާއި ކޮލޮމްބޯ އާ ދެމެދު ސީދާ ދަތުރުތަކެއް މިހާރު ފަށާފައިވާތީ، ވިލާ ކޮލެޖުން އައްޑޫގައި ހިންގާ ކެމްޕަހަށް ކިޔަވަން ރާއްޖޭން ބޭރުން ކުދިން އައުމަކީ އަމާޒެއް ކަމަށް އެ ކޮލެޖުން ބުނެފި އެވެ.
ވިލާ ކޮލެޖުން އައްޑޫގައި ބޭއްވި ކެރިއާ ޑިވެލޮޕްމަންޓް ވޯކްޝޮޕަށް ފަހު، އެ ކޮލެޖްގެ އިސްވެރިންތަކެއް ވަނީ އައްޑޫ ސިޓީ ކައުންސިލާ ބައްދަލުކޮށްފަ އެވެ.
އެ ބައްދަލުވުމުގައި ވިލާ އެކޮލެޖްގެ ރެކްޓަ ޑރ. އަހުމަދު އަންވަރު އާއި، ޑީން އޮފް ސްޓޫޑެންޓްސް ޑރ. އަބްދުﷲ ސޯދިގް އިތުރުން ކޮލެޖްގެ އެގެޒެކެޓިވް ޑިރެކްޓަރު ޑރ. އަލީ ނަޖީބާއި، ޑައިރެކްޓަރު އައިޝަތު މުޙައްމަދުދީދީ އަދި އެސިސްޓެންޓް މެނޭޖަރު އަލީ ޙަމޫދު ހަސަން ބައިވެރިވެ ވަޑައިގަތެވެ.
އެ ބައްދަލުވުމުގައި އަހުމަދު އަންވަރު ވިދާޅުވީ ވިލާ ކޮލެޖްގެ ކޯސްތައް އައްޑޫގައި އިތުރަށް ފުޅާ ކުރަން ވިސްނަމުން ގެންދާ ކަަމަށެވެ.
އޭނާ ވިދާޅުވީ އަންނަ ޖެނުއަރީ މަހު ޔުނިވަސިޓީ އޮފް ވެސްޓް އޮފް އިންގްލޭންޑްގެ އެމްބީއޭ ޕްރޮގްރާމެއް ފެށުމަށް ޜޭވިފައިވާ ކަމަށާއި އަދި މިހާރު ވެސް ޔުނިވަސިޓީ އޮފް ވެސްޓް އޮފް އިންގްލޭންޑްގެ ޑިގްރީ ޕްރޮގްރާމްތައް ހިންގަމުންދާ ކަމަށެވެ.
އަންވަރު އަދި ވިދާޅުވީ މިވަގުތު ވެސް 70 އަށް ވުރެ ގިނަ ދަރިވަރުން ހިތަދޫ ކެމްޕަހުގައި ތަޢުލީމް ޙާޞިލް ކުރަމުންދާ އިރު ކޮލެޖް ހިންގަމުން ދަނީ ކުއްޔަށް ހިފާފައިވާ ގެއެއްގައި ކަމުން ޚިދްމަތްތައް އިތުރަށް ފުޅާ ކުރަން އެހެން އިމާރާތެއް ލިބޭތޯ މަސައްކަތް ކުރަމުންދާ ކަމަށެވެ.
އަދި ސްރީ ލަންކަން އެއާލައިންސްގެ ސީދާ ދަތުރުތައް އައްޑު އަށް ފެށިފައިވާތީ ބޭރުގެ ދަރިވަރުން އައްޑު އަށް ތަޢުލީމް ޙާޞިލްކު ރަން ގެނައުމަކީ ވިލާ ކޮލެޖްގެ ވަރަށް ބޮޑު އުއްމީދެއް ކަމަށް ވެސް އަންވަރު ވިދާޅުވި އެވެ.
ޑރ. ނަޖީބް ވިދާޅުވީ ވިލާ ކޮލެޖްގައި ހިންގާ ޕްރޮގްރާމްތައް ވީ ހާވެސް އަތްފޯރާ އަގުތަކެއްގައި ހިންގުމަކީ އެ ކޮލެޖުން ވަރަށް ބޮޑު އިސްކަމެއް ދޭ ކަމެއް ކަމަށެވެ.
އަދި ޔުނިވަސިޓީ އޮފް ވެސްޓް އޮފް އިންގްލޭންޑްގެ ޑިގްރީ ޕްރޮގްރާމްއަށް ދައްކަން ޖެހޭ ފީ ދެއްކުމުގައި ލުއި ގޮތެއް އިންތިޒާމް ކުރެވިފައިވާ ކަމަށް ވިދާޅުވި އެވެ.
އެގޮތުން އަހަރަކު 30،500ރ. ދައްކަންޖެހޭ އެ ޕްރޮގްރާމްގެ ފީ ހަ އަހަރުގެ މުއްދަތަކަށް ބަހާލައިގެން މަހަކު 417ރ. ދައްކާ ގޮތަށް މޯލްޑިވްސް އިސްލާމިކް ބޭންކާ ގުޅިގެން ވިލާ ކޮލެޖުން ވަނީ ހަމަޖައްސައިފައި ކަމަށް އެ ކޮލެޖުން ބުނެ އެވެ.
މީގެ އިތުރުން ކޯސްތަކުގައި ބައިވެރިވާ ދަރިވަރުންނަށް އެއް ސެމިސްޓަ ބްރިސްޓަލް ކެމްޕަހުގައި ކިޔެވުމުގެ ފުރުސަ ތުވެސް އޮތް ކަމަށްނަޖީބް ވިދާޅުވި އެވެ.
އޭނާ އަދި ވިދާޅުވީ ޔުނިވަސިޓީ އޮފް ވެސްޓް އޮފް އިންގްލޭންޑްގެ ޑިގްރީ ޕްރޮގްރާމް ލަންޑަނަށް ގޮސް ފުރިހަމަ ކުރާ ނަމަ ހަމައެކަނި ޓިއުޝަން ފީއަށް 13،000 ޕައުންޑް ކޮންމެ އަހަރަކު ޚަރަދު ކުރަން ޖޭހޭ ކަމަށެވެ.
މޭޔަރު ވަނީ ވިލާ އިން އައްޑޫގެ ތަޢުލީމް ކުރިއެރުވުމަށް ކުރާ މަސައްކަތަށް ޝުކުރު އަދާ ކުރައްވައިފަ އެވެ.
އޭނާ ވިދާޅުވީ މިހާރު ހަދަމުންގެންދާ ޑެވެލޮޕްމެންޓް ޕްލޭންގައި އުންމީދު ކުރާ އެއް ލަނޑުދަޑި އަކީ ތަޢުލީމީ ދާއިރާ ފުޅާވެގެން ގޮސް މި ސަރަހައްދުގެ އެކި ގައުމުތަކުން އައްޑު އަށް ތަޢުލީމް ހާޞިލް ކުރަން އައުން ކަމަށް ވިދާޅުވިއެވެ.