ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރުމަށް 900 އަށްވުރެ ގިނަ މީހުން ރާއްޖޭގެ އެކިކަންކޮޅުތަކުން މިމަހުގެ އެއްވަނަ ދުވަހާއި ހަމައަށް ފޯމު ހުށައަޅާފައިކަމަށް އިލެކްޝަންސް ކޮމިޝަން އިން ހާމަކޮށްފިއެވެ.
އިލެކްޝަންސް ކޮމިޝަނާއި ހަވާލާދީ އޮންލައިން ނޫސް "ސަން" އިން ޚަބަރު ކޮށްފައިވާގޮތުން މިމަހުގެ އެއްވަނަ ދުވަހާއި ހަމައަށް އިންތިޚާބުގައި ވާދަކުރުމަށް 900 އަށްވުރެ ގިނަ މީހުން އިލެކްޝަންސް ކޮމިޝަނަށް ފޯމު ހުށައަޅާފައިވެއެވެ. އަދި މިހާރު ކުރިއަށްދަނީ ފޯމުތައް ބަލައި ރިިވިއު ކުރުމުގެ މަސައްކަތް ކަމަށްވެސް ކޮމިޝަނުގެ ފަރާތުން މައުލޫމާތު ދެއްވާފައިވެއެވެ.
ލޯކަލް ކައުންސިލް އިންތިޚާބު ކޯޓު އަމުރަކާއި ގުޅިގެން ފަސްކުރެވިފައިވީނަމަވެސް އިންތިޚާބަށް ކުރިމަތިލުމަށް އިތުރު ފުރުސަތެއް ހުޅުވާލަން ގަސްތުކޮށްފައި ނުވާކަމަށްވެސް އިލެކްޝަންސް ކޮމިޝަނުން ހާމަކޮށްފައިވެއެވެ.
ސިވިލް ކޯޓުން ޕީޕީއެމް ހުށައެޅި މައްސަލައަކާއި ގުޅިގެން އަންނަ ޖެނުއަރީ މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބު ދެމަސް ދުވަހަށް ފަސްކުރުމަށް ހުކުމް ކޮށްފައިވާއިރު އެކޮމިޝަނުން ވަނީ މައްސަލަ ހައި ކޯޓުގައި އިސްތިއުނާފު ކޮށްފައެވެ.
އިންތިޚާބު ފަސްކުރުމާއި ގުޅިގެން ގިނަ ބަޔަކު ވަނީ އެކަމުގެ ސަބަބުން ނޭދެވޭ އަސަރުތަކެއް ކުރާނެ ކަމަށް ބުނަމުންނެވެ.