މުޅި ރާއްޖެ އަށް 4ޖީގެ ހިދުމަތް އަންނަ އަހަރު ނިމުމުގެ ކުރިން ދޭނެ ކަމަށް ދިރާގުން ބުނެފި އެވެ.
އެ ކުންފުނިން މިހާރު ވެސް އަންނަނީ ރާއްޖޭގެ އާބާދީގެ 60 ޕަސެންޓަށް 4ޖީގެ ހިދުމަތް ދެމުންނެވެ.
މި ހިދުމަތް ފުޅާ ކުރަމުން އަންނަ މަސައްކަތްތަކާ ބެހޭ ގޮތުން ދިރާގުން ނެރުނު ބަޔާނެއްގައި ބުނީ 4ޖީގެ ހިދުމަތް މުޅި ރާއްޖެ އަށް ފޯރުކޮށްދިނުމަށް ބޭނުންވާ ވަސީލަތްތައް ހޯދުމަށް ދިރާގުން ވަނީ މި ދާއިރާގެ ތަޖުރިބާކާރު ދެ ކުންފުންޏަކާ އެކު އެއްބަސްވުމަކަށް އައިސްފައިވާ ކަމަށެވެ.
އެހެން ނަމަވެސް އެ ކުންފުނިތަކުގެ ނަމެއް ދިރާގުން ހާމައެއް ނުކުރެ އެވެ.
ދިރާގުގެ 4ޖީގެ ހިދުމަތް މިހާރު ލިބެނީ ހއ. ދިއްދޫ، އައްޑޫ، ފުވައްމުލައް، ގއ. ވިލިނގިލި، ގދ ތިނަދޫ، ޅ. ނައިފަރު، ޅ.ހިންނަވަރު، ރ. ދުވާފަރު، ލ. މަތިމަރަދޫ، ލ. ތުނޑި، ނ. ވެލިދޫ، ދ. ކުޑަހުވަދޫ އަދި ހދ. ކުޅުދުއްފުށީގަ އެވެ.
ދިރާގުން އަންނަނީ މީހުން ދިރިއުޅޭ ހުރިހާ ރަށަކަށް 3ޖީގެ ހިދުމަތް ވެސް ދެމުންނެވެ.