ކާމިޔާބު އެތައް ފިލްމެއް ކުޅެ، ޝަރަފުވެރި އެތައް އެވޯޑެއް ހޯދާފައިވާ ބޮލީވުޑްގެ ކުރީގެ މަޝްހޫރު އެކްޓަރު ދިލިޕް ކުމާރު ހޮސްޕިޓަލްގައި މިއަދު އެޑްމިޓްކޮޑްފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި "މުގްލޭ އާޒަމް" އާއި "ނަޔާ ދައުރު" ފަދަ ފިލްމްތައް ކުޅެފައިވާ އެކްޓަރު މުމްބާއީގެ ލިލަވަތީ ހޮސްޕިޓަލްގައި އެޑްމިޓް ކުރީ ކަނާއަތު ފައި ދުޅަވާތީ އެވެ.
މިކަން ދިލިޕްގެ އަންހެނުން އަދި ކުރީގެ ބަތަލާ ސާއިރާ ބާނޫގެ މެނޭޖަރު މުރްޝިދު ވެސް ވަނީ ކަށަވަރުކޮށް ދީފަ އެވެ.
އޭނާ ބުނީ ފައި ދުޅަވާތީ ދިލިޕް ހޮސްޕިޓަލްގައި އެޑްމިޓް ކުރީ ހެނދުނުގެ ވަގުތެއްގައި ކަމަށެވެ. އެކަމަކު އިތުރު ތަފުސީލެއް ނުދެ އެވެ.
މީގެ ކުރިން ވެސް ސިއްހީ ތަފާތު މައްސަލަތަައް ދިމާވެގެން ހޮސްޕިޓަލްގައި އެޑްމިޓްކޮށްފައި އޭނާ އަށް ފަރުވާ ދީފައިވެ އެވެ.
މިހާރު އުމުރުން 93 އަހަރުގެ ދިލިޕަށް ވަނީ އިންޑިއާ ސަރުކާރުން ދޭ މަތީ ބައެއް ޝަރަފުތައް ވެސް ލިބިފަ އެވެ.
އޭގެ ތެރޭގައި ޕަދްމަވިބުޝަން އެވޯޑާއި ދާދާސާހަބް ޕާލްކޭ އެވޯޑް ހިމެނެ އެވެ.
އޭނާ އެންމެ ފަހުން ފެނިގެން ދިޔަ ފިލްމަކީ 1998 ގައި ރިލީޒް ކުރި "ގިލާ" އެވެ.