އުރީދޫ މޯލްޑިވްސް އިން ރާއްޖޭގައި ހައި ސްޕީޑް އިންޓަނެޓްގެ ހިދުމަތް ދިނުމަށް ސަބްމެރިން ކޭބަލް އެޅުމުގެ އަމަލީ މަސައްކަތް މިއަދު އައްޑޫގައި ފަށައިފި އެވެ.
ސަބްމެރިން ކޭބަލާ އެކު ރާއްޖެ އަށް އައި ބޯޓް ރޭ ހިތަދު އަށް ވަދެފައިވާ އިރު ހިތަދޫގައި ގާއިމުކޮށްފައިވާ ލޭންޑިން ސްޓޭޝަނުގައި ސަބްމެރިން ކޭބަލް ގުޅުމުގެ މަސައްކަތް މިއަދު ވަނީ ފަށައިފަ އެވެ.
ރާއްޖޭގައި އުތުރުން ދެކުނަށް ސަބްމެރިން ކޭބަލް އެޅުމުގެ މަޝްރޫއުގެ ކުރިއަށް ގެންދާ އިރު ރާއްޖޭގެ އެކި ކަންކޮޅުތަކުގައި ހަ ލޭންޑިން ސްޓޭޝަން ހަދާފައިވެ އެވެ.
ހިތަދޫގައި އެއް ލޭންޑިން ސްޓޭޝަން ގާއިމުކޮށްފައިވެ އެވެ.
އުރީދޫން ސަބްމެރިން ކޭބަލް އަޅައި، ޚިދުމަތް ފޯރުކޮށް ދޭން ފެށުމުން މިހާރު ފޯރުކޮށް ދެމުން އަންނަ ޚިދުމަތުގެ ފެންވަރު ވަރަށް ބޮޑު ތަން ރަނގަޅުވެ ކުރިއަރައިގެން ދާނެ ކަމަށް އުރީދޫން ބުންޏެވެ.
އަދި ސަބްމެރިން ކޭބަލް އެޅުމަށް ފަހު ބްރޯޑްބޭންޑާއި ފިކްސްޑް ލައިންގެ ޚިދުމަތް ރާއްޖޭގެ އެކި ކަންކޮޅު ތަކުގައި ދިނުމުގެ މަސައްކަތް ކުރިއަށް ގެންދިއުމަށް މަގުފަހިވެގެން ދާނެ ކަމަށް އުރީދޫން ބުންޏެވެ.
ދިވެހި ރާއްޖެއާއި ބޭރު ދުނިޔެ އާ ގުޅައި ދިނުމަށް ސަބްމެރިން ކޭބަލެއް އެންމެ ފުރަތަމަ އެޅި ކުންފުންޏަކީ ވެސް 2007 ގައި އުރީދު އެވެ.
ވަތަނިއްޔާގެ ނަމުގައި ރާއްޖޭގައި މުވާސަލާތީ ޚިދުމަތް ދޭން އުރީދޫ އިން ފެށި ފަހުން ދިވެހި ރައްޔިތުންނަށް ހެޔޮ އަގުގައި، ފެންވަރު ރަނގަޅު ހިދުމަތެއް ދިނުމުގައި އުރީދޫ ވަނީ މުހިއްމު ރޯލެއް ކުޅެފަ އެވެ.