އެކި ދާއިރާތަކުން އައްޑު އަށް ރީތި ނަން ހޯދައި ދީ، ކޮށްފައިވާ ހިދުމަތްތަކުގެ އަގު ވަޒަން ކުރުމުގެ ގޮތުން އައްޑޫ ސިޓީ ކައުންސިލުން ދޭ "އައްޑޫ ސިޓީ އެވޯޑް 2016" އަށް ކުރިމަތިލުމުގެ ފުރުސަތު ހަމަވާނީ މި މަހުގެ 15 ގައި ކަަމަށް ކައުންސިލުން ބުނެފި އެވެ.
މި އަހަރު ފުރަތަމަ ފަހަަރަށް ދޭ އެވޯޑަށް ކުރިމަތިލުމުގެ ފުރުސަތު ހުޅުވާލުމަށް ފަހު، ކުރިން ސުންގަޑި ދިނީ މި މަހުގެ އެއް ވަނަ ދުވަހާ ހަމައަށެވެ.
އެހެން ނަމަވެސް މުއްދަތު އިތުރުކޮށް އެވޯޑަށް އެދޭ ފޯމް ކައުންސިލް އިދާރާއިން މިހާރު އަންނަނީ ދޫކުރަމުންނެވެ.
އެވޯޑާ ބެހޭ އާންމު ގަވައިދުގައި ބުނެފައި ވަނީ އެވޯޑް ލިބޭ ފަރާތްތައް ކަނޑައަޅާނީ ކައުންސިލް އިދާރާ އިން އައްޔަން ކުރާ ފަނޑިޔާރުންގެ ކޮމިޓީއަކުން ކަމަށެވެ.
އައްޑޫ ކައުންސިލުން ދޭ އެވޯޑްގައި ހިމެނެނީ ހަތަރު ގިންތިއެކެވެ. އެއީ ޝަރަފުވެރިކަމުގެ އިނާމާއި ހިތްވަރު ދިނުމުގެ އިނާމާއި ޚިދުމަތުގެ އިނާމާއި މަތީ ދަރަޖަ ހޯދާ ފަރާތްތަކަށް ދެވޭ އިނާމެވެ.
އެވޯޑް ދޭ ހަތަރު ގިންތި:
* ޝަރަފްވެރިކަމުގެ އިނާމެއްގެ ގޮތުގައި ދޭނީ ޝީލްޑަކާއި ޝަރަފުގެ ބެޖަކާއި ހަނދާނީ ލިޔުމެކެވެ.
* މަތީ ދަރަޖައަށް އިނާމެއްގެ ގޮތުގައި ދޭނީ ޝީލްޑަކާއި ހަނދާނީ ލިޔުމެކެވެ.
* ޚިދުމަތުގެ އިނާމެއްގެ ގޮތުގައި ދޭނީ ޝީލްޑަކާއި ހަނދާނީ ލިޔުމެކެވެ.
* ހިތްވަރު ދިނުމުގެ އިނާމެއްގެ ގޮތުގައި ދޭނީ ޝީލްޑަކާއި ހަނދާނީ ލިޔުމެކެވެ.
އެވޯޑް ދޭ މައިގަނޑު ދާއިރާތައް:
* ކީރިތި ޤުރްއާން ކިޔެވުމާއި އުނގަންނައި ދިނުމާއި ކީރިތި ޤުރްއާނުގެ ޢިލްމުގެ ދާއިރާ
* އިސްލާމް ދީނަށް ހޭލުންތެރިކަން އިތުރު ކުރުމާއި، ޚިދްމަތް ކުރުމާއި ދީނީ ޢިލްމު އުނގަންނައި ދިނުމުގެ ދާއިރާ
* ތިމާވެށީގެ ދާއިރާ
* ވިޔަފާރި އާއި އިގުތިސާދީ ދާއިރާ
* މަސްވެރިކަމުގެ ދާއިރާ
* ދަނޑުވެރިކަމުގެ ދާއިރާ
* ސިއްހީ ދާއިރާ
* ތައުލީމީ ދާއިރާ
* ދިވެހި ބަހާއި އަދަބިއްޔާތުގެ ދާއިރާ
* ތާރީހަށް ހިދުމަތް ކުރުމުގެ ދާއިރާ
* ޕަފޯމިން އާޓްސް އާއި ވިޝުއަލް އާޓްސް އަދި އެޕްލައިޑް އާޓްސްގެ ދާއިރާ
* ފަތުރުވެރިކަމުގެ ދާއިރާ
* އިޖުތިމާއީ ހިދުމަތުގެ ދާއިރާ
* ކުޅިވަރުގެ ދާއިރާ
* ހަބަރާއި މައުލޫމާތު ފެތުރުމުގެ ދާއިރާ
އައްޑޫ ސިޓީ އެވޯޑް ދޭނީ ކޮންމެ ތިން އަހަރަކުން އެއް އަހަރު ކަމަށް ކައުންސިލުން ބުންޏެވެ.