މިއަދު ފާހަގަ ކުރާ މަސްވެރިންގެ ދުވަހާ ދިމާކޮށް މަސް ދޯންޏާއި އެހެނިހެން އުޅަނދުފަހަރު އުޅޭ ހިސާބު ފަސޭހަ އިން ބަލައިލެވޭނެ ހިދުމަތެއް "އުރީދޫ ލޮކޭޓް ސެޓެލައިޓް" ގެ ނަމުގައި މިއަދު ތައާރަފުކޮށްފި އެވެ.
އުރީދޫން ބުނީ އަލަށް ތައާރަފު ކުރި ހިދުމަތް ލިބެނީ އެކަމަށް ހާއްސަ ޑިވައިސްއެއް މެދުވެރިކޮށް ކަމަށެވެ. އެ ޑިވައިސްއާ އެކު ޚާއްސަ ވެބް ޕޯޓަލަކާއި އެޕްލިކޭޝަނެއް ވެސް އޮވެ އެވެ.
އެ ކުންފުނިން ބުނީ ސެލިއުލާ ނުވަތަ ރޭޑިއޯ ސިގްނަލް ނުލިބޭ ސަރަހައްދުތަކުގައި ދޯނިފަހަރާއި ފަޅުވެރިން، އެއްގަމާ ގުޅުވައި ދެނީ ސެޓެލައިޓް މެދުވެރިކޮށް ކަމަށްވާތީ، "އުރީދޫ ލޮކޭޓް ސެޓެލައިޓް" މެދުވެރިކޮށް އެ ޚިދުމަތް ލިބޭނެ ކަމަށެވެ.
އަދި އުޅަނދުފަހަރުގެ އިންޖީނުގެ ހާލަތާއި، އުޅަނދުގައި ބޭނުން ކުރާ ތެލުގެ މައުލޫމާތާއި ދަތުރު ކުރާ ރޫޓުތަކާއި އަދި ކަނޑައަޅާފައިވާ ވަކި ސަރަހައްދަކުން ބޭރަށް އުޅަނދު ނުކުމެއްޖެ ނަމަ އެކަން އަންގައިދޭ، ޖިއޯފެންސިންގް އެލާޓެއްގެ ޚިދުމަތް ވެސް ލިބޭނެ އެވެ.
"އުރީދޫ ލޮކޭޓް ސެޓެލައިޓް" ތިން ޕެކޭޖެއްގެ ދަށުން ލިބެ އެވެ.
އެއީ އުރީދޫ ލޮކޭޓް ސެޓެލައިޓް 599، ލޮކޭޓް ސެޓެލައިޓް 799 އަދި ލޮކޭޓް ސެޓެލައިޓް 1،199 އެވެ.