ދުވަސްތަކެއްގެ މެދުކެޑުމަށްފަހު ގަލޮޅު ދަނޑަށް ނިކުތް ރާއްޖޭގައި އުފެދުނު އެންމެ މޮޅު އެއް މިޑްފީލްޑަރ ކަމަށްވާ ޝަމްވީލް ގާސިމް (ބޮންޑާ) ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ފުޓްބޯލް.ކޮމްއިން ހޮވާ އެންމެ މޮޅު ކުޅުންތެރިޔާގެ އެވޯޑަށް ނޮމިނޭޓް ވެއްޖެއެވެ.
2008 ވަނަ އަހަރު ސާފްޗެމްޕިއަންޝިޕް ތަށި އުފުލާލި ޓީމްގައި ހިމެނި، ގައުމީ ޓީމަށް މުހިއްމު ލަނޑުތަކެއް ޖަހާދީފައިވާ ބޮންޑާ ގަލޮޅު ދަނޑާއި ދުރުގައި ހުރުމަށްފަހު އަލުން ގަލޮޅު ދަނޑަށް ނިކުތީ ޓީސީ ސްޕޯޓްސް ކްލަބްގެ ކޯޗު މުހައްމަދު ނިޒާމް (ނިޒަމްބެ)ގެ އެދުމުގެ މަތިންނެވެ.
ޓީސީ ސްޕޯޓްސް ކްލަބާއި އެކު ބޮންޑާ ނިކުމެވަނީ އެޓީމަށް ބޮޑެތި ކާމިޔާބީތަކެއް ހޯދާދީފައެވެ. ޓީސީގެ ކާމިޔާބީގައި ބޮންޑާގެ ހިއްސާ ބޮޑެވެ. މުހިއްމު ގޯލްތަކެއް ޖަހާދީ ޒުވާން ކުޅުންތެރިންނާއި އެކު މޮޅު ހުނަރުތަކެއް ވަނީ ދައްކާފައެވެ.
ބޮންޑާއަކީ ރާއްޖޭގެ ކުޅިވަރު ދަނޑުން ފެނުނު އެންމެ ޑިސިޕްލިން ރަނގަޅު އެއްކުޅުންތެރިޔާއެވެ. އެކަން ހުރިހާ ކޯޗުންވެސް ފާހަގަކުރެއެވެ.
ރާއްޖޭގެ އެންމެ މޮޅު 5 ކުޅުންތެރިންގެ ތެރޭގައި ބޮންޑާ ހިމެނުމާއި ގުޅިގެން "އައްޑޫލައިވް" ކިޔުންތެރިންނާއި މެނޭޖްމަންޓްގެ ނަމުގައި މަރުހަބާ ކިޔަމެވެ.