ކުރިއަށް އޮތް ލޯކަލް ކައުންސިލް އިންތިހާބު ފަސްކުރީ ޕީޕީއެމަށް އިންތިހާބު ކާމިޔާބު ނުކުރެވޭނެ ކަމުގެ ޔަގީންކަން އޮތުމުން ކަމަށާއި އެމްޑީޕީން އައްޑު އަށް ވާދަ ކުރާ ހަތް ކެންޑިޑޭޓުން ވެސް ގޮނޑި ކާމިޔާބު ކުރާނެ ކަމަށް އައްޑޫ މޭޔަރު އަބްދުﷲ ސޯދިގް (ސޯބެ) ރޭ ވިދާޅުވެއްޖެ އެވެ.
މިނިވަން އިންސާފުވެރި އިންތިހާބަކަށް ގޮވާލާ އިދިކޮޅު އިއްތިހާދުން ރޭ ހިތަދޫ އެމްޑީޕީ ހަރުގޭގައި ބޭއްވި ޖަލްސާގައި ސޯބެ ވިދާޅުވީ، އިންތިހާބެއް ބޭއްވުމަށް ގާނޫނުގައި ކަނޑައަޅާފައިވާ ތާރީހެއްގައި އެ އިންތިހާބެއް ނުބޭއްވުމަކީ ބަލައިގަނެވޭނެ ކަމެއް ނޫން ކަމަށެވެ.
އޭނާ ވިދާޅުވީ، ޕީޕީއެމްގެ "ކުޑަ ފަޅިން" ލޯކަލް ކައުންސިލް އިންތިހާބަށް ތައްޔާރު ނުވެވޭ ކަމަށް ބުނެ، އިންތިހާބު ފަސްކޮށް ދިނުމަށް ސިވިލް ކޯޓުގައި އެދި އިންތިހާބު ފަސްކޮށްފައި ވަނީ އިންތިހާބުން ބަލިވާނެކަމުގެ ޔަގީންކަން އޮތުމުން ކަމަށެވެ. އަދި އިންތިހާބު ފަސްކުރީ ވާދަކޮށްގެން ބަލިވާނެކަން އެނގޭތީ ކަމަށް ވިދާޅުވި އެވެ.
ސޯވެ ވިދާޅުވީ އިންތިހާބަށް ކެނޑިޑޭޓުން ކުރިމަތިލުމުގެ ތާރީހު ފަހަނަ އަޅާގޮސްފައި ވާއިރު ޕީޕިއެމްގެ އެއްވެސް ކެނޑިޑޭޓެއް ކުރިމަތިލާފައި ނުވުމުން ދޭހަވަނީ މި އިންތިހާބުގައި ވާދަކުރުމަށް އެ ޕާޓީން ފަސް ޖެހޭ މިންވަރު ކަމަށެވެ.
އޭނާ ވިދާޅުވީ އެމްޑީޕީން ކޮންމެ އިންތިހާބަކަށް ވެސް ކުރިމަތިލަނީ ކާމިޔާބު ހޯދުމަށް ކަމަށާއި، އެގޮތުން 2011 ވަނަ އަހަރާއި 2014 ވަނަ އަހަރުގައި ބޭއްވި ކައުންސިލް އިންތިހާބުގައި ވެސް އެޕާޓީން ބޮޑު ކާމިޔާބިއެއް ހޯދާފައިވާ ކަމަށެވެ.
ސޯބެ ވިދާޅުވީ ހަމަ އެގޮތަށް ކުރިއަށް އޮތް ލޯކަލް ކައުންސިލް އިންތިހާބު ވެސް ބޮޑު ތަފާތަކުން އެމްޑީޕީން ކާމިޔާބު ކުރާނެ ކަަމަށެވެ. އެހެންވެ ކައުންސިލްގެ ހަތް ގޮނޑިއަކީ އެމްޑީޕީގެ ގޮނޑިތަކެއްކަން އޭނާ ފާހަގަ ކުރެއްވި އެވެ.
"ހުރިހާ އެންމެން ގުޅިގެން ނުކުމެ މި ފަހަރުގެ އިންތިހާބު ވެސް އަޅުގަނޑުމެން ކާމިޔާބު ކުރާނަން،" އޭނާ ވިދާޅުވި އެވެ.
ކައުންސިލް އިންތިހާބުގައި އެމްޑީޕީން ވާދަ ކުރާނެ ކެންޑިޑޭޓުން ޕްރައިމެރީއަކުން މިހާރު ވަނީ ހޮވައިފަ އެވެ. އޭގެ ތެރޭގައި ސޯބެ ވެސް ހިމެނިވަޑައިގަންނަވަ އެވެ.
މިއީ އޭނާ ކައުންސިލަށް ކުރިމަތިލައްވާ ތިން ވަނަ ދައުރެވެ.