ގާނޫނު ތަމްފޯޒު ކުރާ މުވައްޒަފަކަށް ގަސްދުގައި ހުރަސް އެޅިކަމުގެ ތުހުމަތުގައި ދައުވާ އުފުލާފައިވާ ރާއްޖެ ޓީވީގެ ދެ ނޫސްވެރިން ކަމަށްވާ ލީވާން އަލީ ނަސީރު އާއި މުހައްމަދު ވިސާމްގެ މައްޗަށް ހުކުމް ކުރުމަށް ބާއްވާ ޝަރީއަތް މިއަދު މެންދުރު 2 ޖަހާއިރަށް ކްރިމިނަލް ކޯޓުގައި ތާވަލް ކޮށްފިއެވެ.
ވިސާމް އާއި ލީވާންގެ މައްޗަށް ދައުވާ އުފުލާފައިވަނީ މިދިޔަ އަހަރުގެ ނޮވެމްބަރު މަހުގެ 2 ވަނަ ދުވަހުގެ ރޭ މާފަންނު ސްޓޭޑިއަމް ސަރަހައްދު އޮޕަރޭޝަނަކަށް ބަންދުކޮށްފައި ވަނިކޮށް އެސަރަހައްދުން ރާއްޖެ ޓީވީގެ ސީއީއޯ ހުސެއިން ފިޔާޒް މޫސާ ހައްޔަރު ކުރަނިކޮށް އެތަނަށް ވަދެ ފުލުހުންގެ ވާޖިބަށް ހުރަސްއެޅިކަމުގެ ތުހުމަތުގައެވެ.
ލީވާން އާއި ވިސާމްގެ މައްޗަށް އުފުލާފައިވާ ދައުވާގެ ހުލާސާ ބަޔާން މިދިޔަ ނޮވެމްބަރު މަހުގެ 23 ވަނަ ދުވަހު ވަނީ އިއްވާފައެވެ. އެ ބަޔާނުގައިވާ ގޮތުން އެރޭ، ލީވާން އާއި ވިސާމް ފުލުހުންގެ ވާޖިބަށް ހުރަސް އެޅުމަށް މަސައްކަތް ކުރިކަމަށް ސާބިތު ކުރެވޭވަރަށް ހެކި ހުށަހެޅިފައި ނުވާކަމަށް ބަޔާނުގައިވެއެވެ.
ވިސާމް އާއި ލީވާންގެ މައްޗަށް ދައުވާ އުފުލައި ހުކުމް ކުރުމަށް ތާވަލްކޮށްފައިވާތީ ގިނަ ނޫސްވެރިން ދަނީ ކަންބޮޑުވުން ފާޅުކުރަމުންނެވެ.