މޯލްޑިވްސް ޕޮލިސް ސަރވިސްގެ ސްޕޯކްސް ޕަރސަން މަޤާމަށް ސްޕްރިންޓެންޑެންޓް އޮފް ޕޮލިސް އަޙްމަދު އާތިފް ހަމަޖައްސަވައިފިއެވެ.
އާތިފް ފުލުސް އިދާރާގެ ސްޕަޯކްސް ޕާސަން އަކަށް އައްޔަން ކުރެއްވި އިރު އިންފޮމޭޝަން އޮފިސަރުގެ މަޤާމަށް ކަނޑައަޅުއްވާފައިވަނީ ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝުހާދުއެވެ.
ފުލުހުންގެ އިދާރާއިން ބުނީ މިދެބޭފުޅުން ޑިސެމްބަރު މަހުގެ 18 ވަނަ ދުވަހުން ފެށިގެން މި ދެމަގާމަށް އައްޔަން ކޮށްފައި ވަނީ މިހާރު އެބޭފުޅުން މޯލްޑިވްސް ޕޮލިސް ސަރވިސްގައި އަދާކުރަމުންދާ މަސްއޫލިއްޔަތުގެ އިތުރުންކަމަށެވެ.
އެގޮތުން ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝުހާދު މިހާރު ހުންނަވަނީ ކޮމިޝަނަރސް ޑައިރެކްޓްރޭޓްގެ ޑެޕިއުޓީ ހެޑްގެ މަޤާމުގައެވެ. އަދި ސްޕްރިންޓެންޑެންޓް އޮފް ޕޮލިސް އަޙްމަދު އާތިފް ހުންނަވަނީ އިންފޮމޭޝަން އެންޑް ކޮމިއުނިކޭޝަން ޑައިރެކްޓްރޭޓްގެ ޑެޕިއުޓީ ހެޑްގެ މަޤާމުގައެވެ.
މޯލްޑިވްސް ޕޮލިސް ސަރވިސްގެ އިންފޮމޭޝަން އޮފިސަރުގެ މަޤާމަށް ޗީފް ސްޕްރިންޓެންޑެންޓް އޮފް ޕޮލިސް އަޙްމަދު ޝުހާދު ކަނޑައަޅުއްވާފައިވަނީ މަޢުލޫމާތު ހޯދައި ލިބިގަތުމުގެ ހައްޤުގެ ޤާނޫނުގެ 36 ވަނަ މާއްދާގެ (ހ) ގައި ފަދައިން މޯލްޑިވްސް ޕޮލިސް ސަރވިސްގެ ފަރާތުން އެޤާނުނުގައިވާ ގޮތުގެމަޔިން މަޢުލޫމާތު ފޯރުކޮށްދޭ އިންފޮމޭޝަން އޮފިސަރުގެ ގޮތުގައެވެ.