މަސައްކަތް ނުނިމި ދިގުލައިގެން ގޮސްފައިވާ ރަންބީރު ކަޕޫރާއި ކެޓްރީނާ ކެއިފް ލިޑް ރޯލް ކުޅޭ ފިލްމް "ޖައްގާ ޖާސޫސް" ގެ ޓްްރެއިލާ ލޯންޗްކޮށް، ފިލްމް ރިލީޒް ކުރާ ތާރީހު އެންމެ ފަހުން އިއުލާންކޮށްފި އެވެ.
ރަންބީރުގެ މަންމަނެއްގެ ރޯލް ކުޅުނު "ބަރްފީ" އަށް ފަހު، އެ ފިލްމުގެ ޑައިރެކްޓަރު އަނޫރާގް ބާސޫ ލިޔެ، ޑައިރެކްޓްކޮށްފައިވާ "ޖައްގާ ޖާސޫސް" ސިނަމާތަކަށް އަންނާނީ އަންނަ އަހަރުގެ އެޕްރީލް މަހުގެ 7 ގަ އެވެ.
މި ފިލްމަކީ ރަންބީރުގެ އަމިއްލަ ޕްރޮޑަކްޝަން ހައުސް، ޕިކްޗަ ޝްރޫ ޕްރޮޑަކްޝަނާއި ޑިސްނީ ގުޅިގެން އުފައްދާފައިވާ ފިލްމެކެވެ. މީގެ މަސައްކަތް ފެށީ 2014 ގަ އެވެ.
އެކަމަކު އެކިއެކި މައްސަލަތައް ދިމާވެ، ފިލްމުގެ މަސައްކަތް ނުނިމި ވަނީ ވަރަށް ބޮޑަށް ދިގުލައިގެން ގޮސްފަ އެވެ.
ހާއްސަކޮށް، ފިލްމުގެ ބައެއް މަންޒަރުތައް އަލުން ރިޝޫޓް ކުރަން ޖެހުމުގެ އިތުރަށް ރަންބީރާއި ކެޓްރީނާގެ ލޯބީގެ ގުޅުން ނިމުމަކަށް ކުއްލިއަކަށް އައުމަކީ ވެސް "ޖައްގާ ޖާސޫސް" އަށް ދިމާވި މައްސަލަތަކެވެ.
އެކަމަކު ޒާތީ ކަންކަން އެއްފަރާތް ކުރުމަށް ފަހު، ދެ ތަރިން ވަނީ އެކުގައި މަސައްކަތްކޮށް ފިލްމު ނިންމާލައިފަ އެވެ.
މިއީ ރަންބީރާއި ކެޓްރީނާގެ ލޯބީގެ ގުޅުން ނިމުމަކަށް އައި ފަހުން، އެ ދެ ތަރިން ސްކްރީނުން އެކުގައި ފެނިގެން ދާނެ ފުރަތަމަ ފިލްމަށްވާތީ، ފިލްމުގެ ބަލާލުމުގެ ޝައުގުވެރިކަން ބޮޑު ކަމަސް ގިނަ ބަޔަކު ބުނެ އެވެ.
ފަހަރުގައި މިއީ އެ ދެ މީހުން އެކުގައި ފެންނާނެ ފަހު ފިލްމަށް ވެސް ވެދާނެ އެވެ.
ރަންބީރާއި ކެޓްރީނާ އެކުގައި ކުޅެފައިވާ އިތުރު ފިލްމުތަކަކީ "ރާޖްނީތީ" އާއި "އަޒަބް ޕްރޭމް ކީ ގަޒަބް ކަހާނީ" އެވެ.