1. ގިނަ އަދަދަކަށް ކެރޮޓިނޮއިޑް ހިމެނޭ
އެވޮކާޑޯއަކީ ލިއުޓީން ނަމަކަށް ކިޔާ ކެރޮޓިނޮއިޑެއް ވަރަށް ގިނައިން އެކުލެވިގެންވާ މޭވާއެކެވެ. ލިއުޓީންއަކީ އެންޓިއޮކްސިޑެންޓެއްގެ ގޮތުގައި މަސައްކަތް ކޮށް، ލޯބަލި ޖެހުމުން ރައްކާތެރި ކޮށްދޭ އެއްޗެކެވެ. އެވޮކާޑޯގައި ޒިއެކްސެންތިން، އަލްފާ-ކެރޮޓީން، ބީޓާ-ކެރޮޓީން އަދި ޓޮކޮފިރޯލް (ވިޓަމިން ޑީ)ފަދަ އެހެނިހެން ކެރޮޓިނޮއިޑްވެސް ހިމެނެއެވެ.
އެވޮކާޑޯ ކެއުމަކީ އެހެން ކާއެއްޗެހީގައި ހުންނަ ކެރޮޓިނޮއިޑްތައް ހަށިގަނޑަށް ނަގައިގަތުމަށް ފަސޭހަކޮށްދޭ ކަމެއްވެސް މެއެވެ. ފަސޭހައިން ހަށިގަނޑަށް ކެރޮޓިނޮއިޑް ހޯދައިދިނުމަށްޓަކައި މިކްސްޑް ސެލެޑެއްގެ ތެރެއަށް އެވޮކާޑޯ އަޅައިގެން ކާށެވެ.
2. ބަރުދަން ލުއިކޮށް ދިނުން
½ އެވޮކާޑޯގައި ސޮލިއުބަލް އަދި އިންސޮލިއުބަލް ފައިބާގެ 3.4 ގްރާމް އެކުލެވިގެންވެއެވެ. މިދެވައްތަރުގެ ފައިބާއަކީވެސް ހަޖަމް ކުރުމުގެ ނިޒާމު ފަސޭހަކަމާއިއެކީ މަސައްކަތް ކުރުމަށްޓަކައި ވަރަށް މުހިންމު އެއްޗެއްސެވެ. އަދި ސޮލިއުބަލް ފައިބާއަކީ ކާބޯހައިޑްރޭޓްތައް ހަޖަމްވާ ރޭޓް ލަސްކޮށްދީ، ގިނައިރު ވަންދެން ބަނޑު ފުލްކޮށް ބަހައްޓައިދޭ އެއްޗެކެވެ.
އެވޮކާޑޯގައި އޯލިކް އެސިޑް ހިމެނެއެވެ. އެއީ ބަނޑު ފުރޭކަމުގެ އިހުސާސް ކުރުވައިދޭ ސިކުނޑީގެ ބައި އެކްޓިވޭޓް ކޮށްދޭ އެއްޗެކެވެ. އޯލިކް ހިމެނޭ ދުޅަހެޔޮ އަންސެޗުރޭޓެޑް ފެޓްއަކީ ގެއްލުން ބޮޑު ސެޗުރޭޓެޑް ފެޓްއަށްވުރެ ބޮޑަށް މީހާގެ ބަނޑު ފުރުވައިދޭ އެއްޗެއްކަން ވަނީ ދިރާސާތަކުން ދައްކާފައެވެ.
3. ހަކުރު ލެވެލް ސްޓެބިލައިޒް ކޮށްދިނުން
އެވޮކާޑޯއަކީ ހަޖަމް ކުރުން ލަސްކޮށްދީ، ކެއުމަށްފަހު ލޭގައި ހަކުރު ހުންނަ މިންވަރު ކުއްލިއަކަށް މައްޗަށް ދިއުން ހުއްޓުވައިދޭ އެއްޗެކެވެ. ގިނަ އަދަދަކަށް ރަނގަޅު ފެޓްސް އެކުލެވިގެންވާ އެއްޗެހި ކެއުމުން އިންސުލިން ރެސިސްޓެންސްގެ މައްސަލަ މުޅިން ރަނގަޅު ވުމުގެ ފުރުސަތުވެސް އެބައޮތެވެ. ސޭންޑްވިޗު ހަދާއިރު މަޔޮނައިޒްގެ ބަދަލުގައި ފުނޑާފައިހުރި އެވޮކާޑުން ބޭނުންކުރާށެވެ. އަދި ބަޓަރުގެ ބަދަލުގައިވެސް ޕާނާއިއެކު އެވޮކާޑޯ ބޭނުންކުރާށެވެ.
4. ބަނޑުގައިވާ ދަރިފުޅާއި ހިތް ރައްކާތެރިކޮށް ދިނުން
އެއް ޖޯޑް އެވޮކާޑޯގައި ދުވާލަކަށް ބޭނުންވާ ފޯލޭޓްގެ ¼ މިންވަރު ހިމެނިގެންވެއެވެ. ފޯލޭޓްއަކީ އުފެދުމުގައި ހުންނަ މައްސަލަތައް ޖެހުމުގެ ފުރުސަތު ހަނިކޮށްދޭ ވިޓަމިންއެކެވެ. މާބަނޑު އަންހެނުން އެވޮކާޑޯ ކެއުމަކީ ބަނޑުގައިވާ ދަރިފުޅު ވަރަށް ގިނަ ކަންތައްތަކުން ރައްކާތެރި ކޮށްދޭ ކަމެކެވެ.
ގިނަ އަދަދަކަށް ހަށިގަނޑުގައި ފޯލޭޓް ހުރުމަކީ ހާޓް އެޓޭކްއާއި އެހެނިހެން ހިތުގެ ބަލިތައް ޖެހުމުގެ ފުރުސަތު ކުޑަކޮށްދޭ ކަމެކެވެ. އަދި ޚާއްސަކޮށް އާއިލާގައި ހިތުގެ ބަލީގެ މައްސަލަތައް ހުންނަ މީހުން އުޅޭނަމަ، އެވޮކާޑޯ ކެއުމަކީ ރަނގަޅު ކަމެކެވެ. އެވޮކާޑޯ ކެއުމަކީ ހިތް ދުޅަހެޔޮކަން މަތީ ދަމަހައްޓައިދޭ ކަމެކެވެ.
5. ކޮލެސްޓްރޯލް ލެވެލް ދަށްކޮށްދިނުން
އެވޮކާޑޯގައި ހިމެނޭ އޯލިކް އެސިޑަކީ ކޮލެސްޓްރޯލް ހުންނަ މިންވަރު ކުޑަކޮށްދޭ އެއްޗެކެވެ. ދިރާސާއަކުން ދައްކާފައިވާ ގޮތުގައި އެވޮކާޑޯ ގިނައިން ކާމީހުންނަކީ ޖުމްލަ ކޮލެސްޓްރޯލް ލެވެލް ދަށްކޮށް ތިބޭ މީހުން ކަމަށެވެ. އެގޮތުން އެމީހުންގެ އެލްޑޯއެލް ކޮލެސްޓްރޯލް ދަށްވެ، އެޗްޑީއެލް (ރަނގަޅު) ކޮލެސްޓްރޯލް ލެވެލް 11 އިންސައްތަ އިތުރެވެ.
ކޮލެސްޓްރޯލް ލެވެލް މަތިވުމަކީ ހިތުގެ ބަލި ޖެހުމަށް މެދުވެރިވާ މައިގަނޑު އެއް ސަބަބެވެ. ކޮލެސްޓްރޯލް ދަށްކޮށް ދިނުމާއި އޭގައި ގިނަ އަދަދަކަށް ފޯލޭޓް ހިމެނުމުގެ ސަބަބުން، އެވޮކާޑޯ ކެއުމަކީ މީހާގެ ހިތް ދުޅަހެޔޮ ކޮށްދޭ ކަމެކެވެ.