މާމެންދޫ ސަރަހައްދުން ދިރިއުޅުމަށް ދޫކުރި ގޯތިތައް ސަރުކާރުގެ ބޭނުމަށް ނަގާފައިވާ މައްސަލަ ހައްލު ކުރުމަށް މަސައްކަތް ކުރަމުންދާކަމަށް މޯލްޑިވްސް ލޭންޑް އެންޑް ސާވޭ އޮތޯރިޓީން ބުނެފި އެވެ.
އެ އޮތޯރިޓީން ބުނީ މާމެންދޫ ސަރަހައްދުން ގޯތި ލިބިފައިވާ ފަރާތްތަކުން، އެކަން އެނގޭނެ ރަސްމީ ލިޔުމާއި އެކު އެމީހަކާއި ގުޅޭނެ ފޯނު ނަންބަރާއި އެކު ހިތަދޫގައި ހުންނަ މިނިސްޓްރީ އޮފް ހައުސިންގެ ލޭންޑް އެންޑް މުނިސިޕަލް ސާވިސްއަށް އަންނަ ފެބްރުއަރީ މަހުގެ 28 ވަނަ ދުވަހުގެ މެންދުރު 1 ޖެހުމުގެ ކުރިން ހުށަހެޅުމުން އެކަން ބަލާދޭނެ ކަމަށެވެ.
މާމެންދޫ ސަރަހައްދުން ގިނަ އަދަދެއްގެ ގޯތި ސަރުކާރުގެ ބޭނުމަށް ނަގާފައިވާ އިރު ފާއިތުވި އަހަރުތަކުގައި އެގޯތި ތަކުގެ ވެރިންނަށް ގޯތި އަނބުރާ ދިނުމަށް ތަފާތު ފަހަރު މަތިން މަސައްކަތް ކޮށްފައިވެއެވެ. ނަމަވެސް އެކަން ކުރިއަށް ގެންގޮސްފައި ނުވެއެވެ.
މާމެންދޫ ސަރަހައްދުން ދޫކުރި ގޯތިތައް ސަރުކާރުގެ ބޭނުމަށް ނަގާފައިވަނީ 2011 ވަނަ އަހަރު އައްޑޫގައި ބޭއްވި ސާކް ސަމިޓަށް ހިތަދޫ އީސީސީ އިމާރާތް ކުރުމަށެވެ.