އެޓެސްޓު ކުރުން ނުވަތަ އެކިއެކި ލިޔުންތަކުގައި އަސްލާ އެއްގޮތް ކަމުގެ ތައްގަނޑު ޖަހައި ދިނުމުގެ ޚިދުމަތުން އަންނަ މަހުން ފެށިގެން ފީއެއް ނަގާ ގޮތަށް އައްޑޫ ސިޓީ ކައުންސިލުން ހަމަޖައްސައިފި އެވެ.
ކައުންސިލުން ބުނީ އެގޮތަށް ނިންމީ ލާމަރުކަޒީ އުޞޫލުން ހިންގުމުގެ ޤާނޫނުގެ 80 ގެ ދަށުން ކައުންސިލުން ދެމުން ގެންދާ ލިޔުންތަކުގައި އަސްލާއި އެއްގޮތް ކަމުގެ ތައްގަނޑުޖަހައި ދިނުމުގެ ޚިދުމަތުން ފީނެގުމާ ބެހޭ ގޮތުން މި މަހުގެ ހަ ވަނަ ދުވަހު ބޭއްވި ކައުންސިލްގެ ވަނަ ބައްދަލުވުމުގައި ކަމަށެވެ.
އެ ބައްދަލުވުމުގައި ވަނީ އެފަދަ ލިޔުންތަކުން ފީނަގާނެ ގޮތުގެ އުސޫލެއް ފާސްކޮށްފަ އެވެ.
އެގޮތުން އަންނަ މަހުގެ އެއް ވަނަ ދުވަހުން ފެށިގެން އެ އުސޫލަށް އަމަލު ކުރަން ފަށާނެ ކަމަށް ކައުންސިލުން ބުންޏެވެ.
އަސްލާ އެއްގޮތް ކަމުގެ ތައްގަނޑު ޖަހައި ދިނުމަށް ހުށަހަޅޭ ކޮންމެ ލިޔުމަކުން ނަގާނީ 2ރ. އެވެ.
މި ހިދުމަތަށް އެދޭ ފޯމް ކައުންސިލްގެ ވެބްސައިޓް adducity.gov.mv/downloads އިން ޑައުންލޯޑު ކުރެވޭނެ އެވެ.
އަދި ޚިދުމަތަށް އެދޭ ފޯމު ކައުންސިލް މިއިދާރާ އާއި އަވަށު އަވަށު އޮފީސްތަކުގެ ކައުންޓަރުން ވެސް ލިބެން ހުންނާނެ ކަމަށް ކައުންސިލުން ބުންޏެވެ.