ނުކުޅެދުންތެރިކަން ހުންނަ މީހުންނަށް ވަޒީފާ ދޭން ސަރުކާރުން ކުރިއަށް ގެންދާ މަސައްކަތުގެ ތެރެއިން އިއްޔެ 100 މީހަކަށް ވަޒީފާ ލިބިގެން ދިޔަ އިރު، މީގެ ތެރޭގައި އައްޑޫގެ ވަރަށް ފާހަގަކޮށްލެވޭ މީހަކު ހިމެނެ އެވެ.
އެއީ ފޭދޫ އަލީ އަބްދުﷲ (އަބޭ އައްދު) އެވެ. އޭނާއަކީ ކަނާތުގެ އެއް ބައި ނެތް މީހެކެވެ.
ފެނަކަ ކޯޕަރޭޝަނުން އިއްޔެ ވަޒީފާ ދިން މިހުންގެ ތެރޭގައި އައްދު ހިމެނުމުން އޭނާ ދަންނަ ވަރަށް ގިނަ ބަޔަކު އަންނަނީ ސޯޝަލް މީޑިއާގައި ވެސް މަރުހަބާ ކިޔަމުންނެވެ. އަދި މި ލިބުނު ފުރުސަތުގެ ބޭނުން ރަނގަޅު ގޮތުގައު ހިފުމަށް ގިނަ ބަޔަކު ވަނީ އޭނާ އަށް ނަސޭހަތްތެރިވެފަ އެވެ.
އައްދުއަކީ އުފަންވި އިރު ނުކުޅެދުންތެރި ކަމެއް ހުރި މީހެއް ނޫނެވެ. އޭނާގެ ކަނާތުން ބައެއް ބުރިކޮށްލަން ޖެހުނީ ކުރިމަތިވި ހިތާމަވެރި ހާދިސާއެއްގަ އެވެ.
އެއީ އޭނާ ފޭދޫ ސްކޫލްގައި ކިޔަވަމުން ދިޔަ ދުވަސްވަރު، ފޭދޫ ސްކޫލް ކައިރީގައި މިހާރު ހުރި ރަށުގެ ހުކުރު މިސްކިތް އިމާރާތް ކުރަމުން ދިޔަ އިރު، އެތަނުގައި ހުރި ސިމެންޓް ގަށާ މެށިނެއްގެ ތެރެއަށް އަތް ކޮއްޕުމުން އަތްތިލަ އާ އެކު، އަތުގެ އުޅަބޮށީގެ ތިރި އެއްކޮށް ދިޔައީ އެވެ.
އައްދު މީގެ ކުރިން ވަނީ ބައެއް ރިސޯޓްތަކާއި އަމިއްލަ ބައެއް ކުންފުނިތަކުގައި ވެސް މަސައްކަތްކޮށްފަ އެވެ.
އޭނާ އަށް އަލަަށް މި ލިބުނު ފުރުސަތާ އެކު މަސައްކަތް ކުރާނީ ފެނަކަގެ އައްޑޫ ބްރާންޗްގަ އެވެ.