ހުޅުލޭ އެއާޕޯޓުގެ ނަން ތިން ވަނަ ފަހަރަށް ބަދަލު ކުރީއެވެ. މިފަހަރު ކިޔަނީ ވެލާނާ އިންޓަނޭޝަނަލް އެއާޕޯޓެވެ. ރައީސް އޮފީހުން ބުނެފައިވާ ގޮތުގައި ވެލާނާ އިންޓަނޭޝަނަލް އެއާޕޯޓުގެ ނަމަށް ބަދަލުކުރީ، އެ އެއާޕޯޓަށް މިހާރު ގެންނަމުން އަންނަ އުމްރާނީ ތަރައްގީ އާއި ރާއްޖޭގެ ބްރޭންޑް ރަމްޒުކޮށްދޭ، ފަސޭހަ އަދި ކުރިއެރުމާއި ތަރައްގީގެ ވިސްނުމަށް މަގުފަހިކޮށްދޭ ނަމަކަށް ހަމަޖެއްސުމަށްޓަކައި ކަމަށެވެ.
ސުވާލަކީ، ހުޅުލޭ އެއާޕޯޓް ހެދުމަށް އެންމެ ފުރަތަމަ ބުރަ މަސައްކަތް ކުރި ފަރާތްތަކުގެ އަގު ވަޒަން ކުރެވޭ ފަދަ ނަމެއް އެއާޕޯޓަށް ނުދޭން ވީ ކީއްވެ ހެއްޔެވެ؟
އެފަރާތްތަކުގެ ބުރަ މަސައްކަތުގެ އަގު ވަޒަން ކުރުމުގެ އަޅުގަނޑުގެ ނަޒަރުގައި ހުޅުލޭ އެއާޕޯޓަށް ކިޔަން ޖެހެނީ "ރާއްޖެތެރޭ" އިންޓަނޭޝަނަލް އެއާޕޯޓެވެ. އަޅުގަނޑު ރާއްޖެތެރޭ މިބަސް ބޭނުން މިކުރަނީ އެއްވެސް ހާލެއްގައި އަތޮޅު ތެރޭގެ ރައްޔިތުންގެ ޤަދަރު ކުޑަކޮށްލުމަކަށް ނޫނެވެ.
އެއާޕޯޓުގެ ނަން، ރާއްޖެތެރޭ އިންޓަނޭޝަނަލް އެއާޕޯޓްގެ ނަމަށް ބަދަލުކުރަން ޖެހެނީ މި ސަބަބުތަކާއި ހުރެއެވެ.
ހުޅުލޭ އެއާޕޯޓް ތަރައްޤީކުރެވިގެން އައި ގޮތަށް ބަލާއިރު، އެ މަސައްކަަތަށް އަމިއްލަ ދަރިންނާއި ވަޒަން ދޫކޮށްފައި ދިޔައީ، ފަޚުރުވެރި ރާއްޖެތެރޭ މީހުންނެވެ. އެއާޕޯޓުގެ ތަރައްޤީއަށް ކަމަށް ބުނެ ފޭރިގަނެގެން ދިޔައީ ރާއްޖެތެރޭ ރަށްތަކުގައި ހުރި ހަރު މުދަލެވެ. އާނ އެކެވެ. ގެންދިޔައީ ސ.ގަން އެއާޕޯޓުގައި އިނގިރޭސިން ޤާއިމްކުރި ވަސީލަތްތަކެވެ.
އެއީ މާޒީއެވެ. ދެން ދައްކަން އޮތީ މިހާރުގެ ވާހަކައެވެ. ހުޅުލޭ އެއާޕޯޓް ތަރައްޤީކުރުމުގެ މަސައްކަތް ކުރުމަށް، ރާއްޖެތެރޭ ރަށްތަކުގައި ތަރައްޤީގެ ޕްރޮޖެކްޓްތައް މަޑުޖައްސާލެވެއެވެ. ރާއްޖެތެރޭ މީހުންނާއި މުޅި ދިވެހިރައްޔިތުންގެ ބޮލުގައި އިތުރު ދަރަނި އަޅުވައި އެހެރަ ނަގަމުން ދަނީ އެއާޕޯޓް ތަރައްޤީކުރާ ލޯނުތަކެވެ.
އަދި ކޮބައިތޯއެވެ! ކުލި ދައްކައިގެން ހަނާވަމުންދާ ރާއްޖެތެރޭ މީހުން އުޅެމުން މިދަނީ، އެއާޕޯޓާއި ޖެހިގެން އޮތް މާލެ އާއި ހުޅުމާލޭގައެވެ. ހިތާމައާއި ހިތްދަތިކަމުގައި ކުލި ދެއްކުން ނޫން ގޮތެއް ނެތިފައި ތިބި ރާއްޖެތެރޭ މީހުންނާއި، އަސާސީ ޚިދުމަތްތައް ނުލިބި ގޮތް ހުސްވެފައި ރަށުގައި ތިބި ރާއްޖެތެރޭ މީހުންގެ ހިތްތަކަށް ތަސައްލީ އެއް ގެނެސް ދިނުމަށް ވެސް އެއާޕޯޓްގެ ނަން ރާއްޖެތެރޭ އިންޓަނޭޝަނަލް އެއާޕޯޓަށް ބަދަލުކުރަން ޖެހެއެެވެ.
ދެން މިއޮތީ ހުޅުލޭ އެއާޕޯޓުގެ ނަން "ރާއްޖެތެރޭ އިންޓަނޭޝަނަލް އެއާޕޯޓް" އަށް ބަދަލުކުރުމުން ސަރުކާރަށް ލިބޭނެ ފައިދާތަކުގެ ވާހަކައެވެ.
އިންތިޚާބެއް ބޯމަތިވެފައި އޮތް ދަނޑިވަޅެއްގައި ތިމަންނާމެން ތި މީހުންގެ ނަން ރާއްޖޭގެ އެންމެ ބޮޑު އެއާޕޯޓަށް ވެސް ކިޔައިފީމޭ ސަރުކާރުގެ ވެރިންނަށް ބުނެވިދާނެއެވެ. އޭރުން އެއާޕޯޓް އަޅައިދޭށޭ ބަނދަރު ހަދައިދޭށޭ ގޮވާ ކޮންމެ ފަހަރަކު ރާއްޖޭގެ އެންމެ ބޮޑު އެއާޕޯޓަކީ ކަލޭމެން އެންމެންގެ އެއާޕޯޓޭ ބުނެވިދާނެއެވެ. އެހިސާބުން ކުޅުދުއްފުށީ މީހުންނަށް އެއާޕޯޓް އަޅައި ނުދޭން އިތުރު ބަހަނާ ދައްކަން ނުޖެހޭނެތާއެެވެ.
ނަން ބޯޑު ބަދަލު ކުރުމާއި، އެއްތަނުގައި ހުންނަ ބިނާ އެހެން ތަނަކަށް ބަދަލުކޮށް، ކުލަބަދަލުކޮށް ހުޅުވާ މިސަރުކާރުން "ރާއްޖެތެރޭ އިންޓަނޭޝަނަލް އެއާޕޯޓް" ގެ ނަން ހުޅުލޭ އެއާޕޯޓަށް ދީފިނަމަ އޭރުން ރާއްޖެތެރެ އެއްކޮށް ތަރައްޤީ ކުރެވުނީއެވެ. ރާއްޖެތެރެ ބޭރުގެ ދުނިޔެއާއި ގުޅާލެވުނީއެވެ. އޭރުން ރާއްޖެތެރެ އަލުން ދެން ތަރައްޤީ ކުރާކަށް ނުޖެހިދާނެއެވެ.
ވެލާނާ އިންޓަނޭޝަނަލް އެއާޕޯޓް ކިޔުމަކުން ނާސިރަށް ވަކި ނިސްބަތް ކުރެވެނީއެއް ނޫނެވެ. ނާސިރު އިސްވެ ހުންނަވައިގެން އެއާޕޯޓް ހެދި ނަމަވެސް ރާއްޖެތެރޭ މީހުންގެ ދައުރުމާ ބޮޑެވެ. އެމީހުންވި ގުރުބާނީ މާ ބޮޑެވެ. އެހަނދާން ހުރި އެތައް ބަޔަކު އަދިވެސް ދުނިޔޭގައި އެބައުޅެއެވެ.
އެހެންވީމާ "ރާއްޖެތެރޭ އިންޓަނޭޝަނަލް އެއާޕޯޓް" ނުކިޔަންވީ ސަބަބެއް ހަމަ ނެތެވެ.