ޑިޒްނީ ފިލްމެއް ކަމަށްވާ 'ބެމްބި' އުފެއްދުމުގެ އިންސްޕިރޭޝަން ކަމަށްވާ މަޝްހޫރު ކުރެހުންތެރިޔާ ޓައިރަސް ވޮންގް މަރުވެއްޖެ އެވެ.
އޭނާ މަރުވި އިރު އުމުރަކީ 106 އަހަރެވެ.
ޗައިނާގެ އިމިގްރެންޓެއް ކަމަށްވާ ވޮންގްގެ ކުލަގަދަ ކުރެހުންތަށް ވޮލްޓް ޑިޒްނީގެ ލޮލަށް ފެނުމުން، އެކުރެހުންތައް ވެގެންދިޔައީ 'ބެމްބި' ފިލްމްގެ ބިންގަލަށެވެ.
ވޮލްޓް ޑިޒްނީ ފެމިލީ މިއުޒިއަމްއިން ނެރުނު ބަޔާނެއްގައި ބުނެފައިވަނީ އެނިމެޓޭޑް ފީޗާ ފިލްމް ކަމަށްވާ 'ބެމްބި'ގެ ކުރެހުންތަކުން ވޮންގްގެ ނުފޫޒް ވަރަށް ބޮޑަށް ފެނިގެންދާ ކަމަށެވެ.
ވޮންގް ނިޔާވެފައިވަނީ އޭނާގެ އާއިލާގެ ކައިރީގައި އޭނާގެ އަމިއްލަ ގޭގައެވެ.
ކުޑައިރު ވޮންގްވަނީ އޭނާގެ ބައްޕައާއިއެކު ޗައިނާއިން އެމެރިކާއަށް ހިޖުރަ ކޮށްފައެވެ.
ކުރެހުންތެރިކަން ކިޔެވުމަށްފަހު އޭނާވަނީ 1938 ވަނަ އަހަރު ޑިޒްނީއާއިއެކު މަސައްކަތް ކުރަން ފަށާފައެވެ.
ޑިޒްނީގައި އެންމެ ތިން އަހަރު ދުވަހު މަސައްކަތް ކުރުމަށްފަހު ޓައިރަސް ވޮންގް ވަނީ ވޯނާ ބްރަދާސްގައި ކޮންސެޕްޓް ކުރެހުންތެރިޔެއްގެ މަޤާމަށް ގޮސްފައެވެ.
ޓައިރަސް ވޮންގްއަށް ވަނީ އޭނާގެ މަސައްކަތް ބަލައިގަތުމުގެ ގޮތުން އެތައް އެވޯޑްތަކެއް ލިބިފައެވެ. އަދި އޭނާގެ ދިރިއުޅުމުގެ މައްޗަށް ބިނާކޮށް ޑޮކިއުމެންޓްރީއެއްވެސް ވަނީ ހަދާފައެވެ.
އެޑޮކިއުމެންޓްރީގެ ޑައިރެކްޓަރު ބުނެފައިވާ ގޮތުގައި ޓައިރަސް ވޮންގްގެ މަރާއިއެކު ވަރަށް މޮޅު ކުރެހުންތެރިޔެއް ދުނިޔެއިން ގެއްލިގެން ގޮސްފިކަމަށެވެ.