އައްޑޫގައި އިމާރާތްކޮށްފައިވާ ކޮންވެންޝަން ސެންޓަރު ބޭނުން ނުކޮށް ވީރާނާވާން ދޫކޮށްލުމަށްފަހު ހޮސްޕިޓަލަކަށް ބަދަލު ކުރުމުގެ އަމަލީ މަސައްކަތް ފެށިތަނުން ލ. އަތޮޅުގައި ކޮންވެންޝަން ސެންޓަރެއް ހަދާނެ ކަމަށް ސަރުކާރުން އިއްލާންކޮށްފިއެވެ.
ލ. ކައްދޫ އޮންނަ އިސްކަންދަރު ވައިގެ މަރުކަޒު ސަރަޙައްދުގައި ކޮންވެންޝަން ސެންޓަރެއް ތަރައްޤީ ކުރައްވާނެ ކަމަށް ޑިފެންސް މިނިސްޓަރ އާދަމް ޝަރީފު ޢުމަރު ވިދާޅުވީ އިއްޔެ އެތަނުގައި ކާގޯގެ ޚިދުމަތާއި، ސީ.އައި.ޕީ ލައުންޖެއްގެ ޚިދުމަތް އިފްތިތާޙް ކޮށްދެއްވުމަށްފަހު ވާހަކަފުޅު ދައްކަވަމުންނެވެ.
އައްޑޫ ކޮންވެންޝަން ސެންޓަރ ކޮންވެންޝަނަލް ޓޫރިޒަމްއަށް ތަރައްޤީ ކުރުމަށް ރައްޔިތުން އެދިއެދި ތިއްބާ އެތަން ވީރާނާވާން ދޫކޮށްލައި އޮތުމަށްފަހު ލ. އަތޮޅުގައި ކޮންވެންޝަން ސެންޓަރު ހަދަނީ ކައްދޫ އެއަރޕޯޓު، އަސްކަރީ އެއަރޕޯޓެއްގެ ގޮތުގައި ތަރައްޤީ ކޮށް، ބިޒްނަސް މޮޑެލަކަށް އެތަން ހިންގައި އެ އެއަރޕޯޓުން ހައްދުންމަތީގެ ހުރިހާ ރަށްރަށުގެ ރައްޔިތުންނަށް އިޤްތިސާދީ ފައިދާކުރާނެ ފަދަ ވަސީލަތްތަކާއި ޚިދުމަތްތައް ޤާއިމު ކުރެއްވުމަށް ކަމަށް ޑިފެންސް މިނިސްޓްރ އާދަމް ޝަރީފް ވިދާޅުވިއެވެ.
އައްޑޫ އީސީސީ ހޮސްޕިޓަލަކަށް ބަދަލު ކުރަން ސަރުކާރުން ނިންމިއިރު އައްޑޫގެ ރައްޔިތުން ތިބީ ގަމުގެ ވައިގެ ބަނަދަރުގެ ތަރައްޤީ އާއި އެކު ކޮންވެންޝަން ޓޫރިޒަމްގެ އިންތިޒާރުގައެވެ. އަދި ރައްޔިތުން އާދޭސް ކުރަމުން އައީ ހިތަދޫ ސްޓޭޑިއަމް ސަރަހައްދުން ހޮސްޕިޓަލް އެޅުމަށް ނިންމާފައިވާ ބިމުގައި 100 އެނދުގެ ހޮސްޕިޓަލެއް އެޅުމަށެވެ.
ނަމަވެސް ސަރުކާރުން މިވަނީ އެޕްލޭން ބަދަލުކޮށް އީސީސީ ހޮސްޕިޓަލަކަށް ހެދުމަށް ރޫޅާލާފައެވެ.
ޑިފެންސް މިނިސްޓަރ އާދާމް ޝަރީފް ވިދާޅުވީ ލ. އަތޮޅުގައި ހަދާ ކޮންވެންޝަން ސެންޓަރުގެ މަސައްކަތް މިއަހަރު ފެށިގެންދާނެ ކަމަށެވެ.