2014 ވަނަ އަހަރުގެ ޖެނުއަރީ މަހު އައްޑޫ ސިޓީ ހިތަދޫގައި ބޭއްވި ޖަލްސާއެއްގައި ވާހަކަ ދައްކަވަމުން ވިދާޅުވީ އިކްޓޯރިއަލް ކޮންވެންޝަން ސެންޓަރު (އީސީސީ) އާ އެކު އެތަން ހިމެނޭ ސަރަހައްދު ޓޫރިޒަމާ ގުޅުވައިގެން ތަރައްގީ ކުރެވޭނެ ކަމަށް ވިދާޅުވިއެވެ.
އެއީ މާޒީއެވެ. ފަލްސަފާއެވެ. މިހާރު މަންޒަރު ބަދަލުވެ ރައީސް އަބްދުﷲ ޔާމީންގެ ވިސްނުންފުޅު ހުރީ އިކުއިޓޯރިއަލް ކޮންވެންޝަން ސެންޓަރ (އީސީސީ) ހޮސްޕިޓަލަކަށް ބަދަލުކުރުމަށެވެ. އެ ބަދަލު ގެނެވެނީ ރައްޔިތުންގެ ރުހުމުގައިތޯ ނުރުހުމުގައިތޯ އެއީ މުޅިން އެހެން ވާހަކައެކެވެ.
ޔަޤީންވާ ކަމަކީ ވަކި ބޭނުމެއްގައި ބިނާކުރި ތަނެއް ހޮސްޕިޓަލަކަށް ބަދަލުކުރަން ޖެހުނު ސަބަބާއި މެދު ގިނަ ބަޔަކު ސުވާލު އުފައްދަން ފެށި ކަމެވެ.
ހޮސްޕިޓަލް އަޅަން ވަކި ބިމެއް ޚާއްސަކޮށްފައި ވަނިކޮށް އީސީސީ ހޮސްޕިޓަލަކަށް ބަދަލުކުރަން ޖެހުނު ސަބަބާއި މެދު ގިނަ ބަޔަކު ސުވާލު އުފައްދަން ފެށުމުން ސަރުކާރުން އޭގެ ޖަވާބު ވެސް ދިނެވެ.
އީސީސީ އިން އައްޑޫގެ އިޤްތިސާދަށް ފައިދާތަކެއް ނުކުރާނެ ކަމަށް ބުނެއެވެ. ކޮންވެންޝަން ސެންޓަރަކުން އައްޑޫއަށް ލިބޭނެ ފައިދާއެއް ނެތްކަން ވިސްނައިދެވޭތޯ ސަރުކާރުން މަސައްކަތް ފެށީ 2013 ވަނަ އަހަރުން ފެށިގެންނެވެ. ރައްޔިތުންގެ ލޯމަތީގައި އެތަން "ވީރާނާ" ކޮށްލަން ދޫކޮށްފައި ބެހެއްޓީ، އީސީސީ އިން އައްޑޫއަށް ކުރާނެ ފައިދާއެއް ނެތްކަން ވިސްނައިދޭން ކަމަށް ބުނުމުގެ ފުރުސަތު އެބައޮތެވެ.
އައްޑޫގައި 2011 ވަނަ އަހަރު ސާކް ސަމިޓް ބޭއްވި ދުވަސްވަރަކީ، ފަހުގެ ތާރީޚެއްގައި އައްޑޫގެ ރައްޔިތުންގެ އަތްމަތި އެންމެ ތިޔާގިވި ދުވަސްވަރެވެ. ސާކް ސަމިޓާއި ދިމާކޮށް ފައިދާ ނުލިބޭ މީހަކު އައްޑޫގައި ނެތޭ ބުނުމަކީ ގޯހަކަށް ނުވާނެއެވެ. ސާފު ބޯފެނާއި ނަރުދަމާގެ ނިޒާމެއް ޤާއިމްކުރުމުގެ މަސައްކަތުގެ ބިންގާ އެޅުނީ އީސީސީގެ ބިންގަލާއި އެކުގައެވެ. ތާރު އަޅައިގެން މަގުތަކެއް ހަދައި ބަނދަރުތައް ހަދަން ފެށުނީ ސާކް ސަމިޓަށް އީސީސީ ބިނާކުރަން ފެށުމާއި އެކުގައެވެ. އެކަމަށް އައްޑޫގެ ރައްޔިތުން ދެބަހެއް ނުވާނެއެވެ.
ކޮންމެ އަކަސް އީސީސީ އިން އައްޑޫގެ އިގްތިސާދަށް ފައިދާ ކުރާނެ ކަމެއް ނުފެންނާތީ ސަރުކާރުން އެތަން ބަދަލުކުރަން ނިންމީ ހޮސްޕިޓަލަކަށެވެ. އެވެސް ރައްޔިތުންގެ ޚިޔާލާއި މަޝްވަރާ ނުހޯދައި ނިންމި ނިންމުމެކެވެ. އެއީ ގަމުގައި ހުންނަ އީކުއޭޓާރ ވިލެޖްގައި އައްޑޫގައި ތިބި ޕީޕީއެމްގެ އެކްޓިވިސްޓުންނާއި އެކު ބޭއްވި ބައްދަލުވުމެއްގައި ދެކެވުނު ވާހަކައެކެވެ. އެވާހަކަ މީޑިޔާތަކަށް ތިލަވީ އޭގެ ދުވަސްތަކެއް ފަހުންނެވެ.
10 އަހަރު ދުވަހުން ބޮލަށް ވެއްޓިދާނެ ކަމަށާއި، އަޑިއަށް ހިނގައިދާނެ ކަމަށް އަދި ފެންވަރު ދަށް އިމާރާތެެއް ކަމަށް ބުނެ ވާހަކަ ދެއްކި ފަރާތްތަކުން މިއަދު އީސީސީ އަކީ ރަންގަނޑަކަށް ވެ އެތަން ހޮސްޕިޓަލަކަށް ތަރައްޤީ ކުރަން ފެށުމަކީ، ހައިރާންކުރުވަނިވި ކަމެކެވެ. މިހާރު ފެންމަތިވެގެން މިއުޅެނީ، އެއަށް ވުރެ ބޮޑު ކަމެކެވެ.
ލ.އަތޮޅުގައި ކޮންވެންޝަން ޓޫރިޒަަމަށް ޚާއްސަކޮށްގެން ކޮންވެންޝަން ސެންޓަރެއް ބިނާކުރުމުގެ މަސައްކަތް ސަރުކާރުން ފަށަން ނިންމީ ޔޯލައެވެ. އިސްކަންދަރު އެއާޕޯޓް (ކައްދޫ އެއާޕޯޓް) ސަރަހައްދުގެ އިގްތިސާދީ މުހިއްމު ނާރެހެކަށް ބަދަލުވެގެން ދިއުމުގެ އުއްމީދެއް އޮވެގެންނެވެ. ޑިފެންސް މިނިސްޓަރ އާދަމް ޝަރީފް ވިދާޅުވެފައިވާ ގޮތުގައި މިއަހަރު ތެރޭގައި އެތަނުގައި ކޮންވެންޝަން ސެންޓަރެއް ގާއިމުކޮށް، މުހިއްމު އިވެންޓް ތަކާއި ހަރާކާތްތައް އެތަނުގައި ބޭއްވިގެން ދިއުން ކަމަށެވެ. އޭގެ ސަބަބުން ލ. އަތޮޅުގެ ސަރަހައްދަށް ތަރައްގީގެ ކުރިއެރުން ލިބިގެންދާނެ ކަމަށް މިނިސްޓަރ ވިދާޅުވިއެވެ.
ސުވާލަކީ، ކައްދޫގައި ގާއިމު ކުރެވޭ ކޮންވެންޝަން ސެންޓަރުންވެސް އިގްތިސާދަށް ފައިދާ ކޮށްފާނެ ހެއްޔެވެ؟ ނުވަތަ އެ ކޮންވެންޝަން ސެންޓަރު ވެސް އަޅާ ނިންމާފައި ބަދަލުކުރާނީ އެހެން ކޮންމެވެސް ބިނާއަކަށް ބާވައެވެ.
ބިންބޮޑު އަދި ގިނަ ރަށްތައް ގުޅިފައިވާ އައްޑޫގައި އިންޓަނޭޝަނަލް އެއާޕޯޓެއް ވެސް އޮވެފައި، ކޮންވެންޝަން ސެންޓަރަކުން އިޤްތިސާދީ ނަފާއެއް ނުލިބޭނެ ކަމަށް ސަރުކާރަށް ޤަބޫލުކުރެވުނީ ކީއްވެގެން ހެއްޔެވެ؟ އެއީ ވަކި މީހެއްގެ ވެރިކަމުގައި ބިނާކުރި ތަނަކަށް އީސީސީ ވުމުން ހެއްޔެވެ؟ ނަޝީދުގެ ވެރިކަމުގައި ބިނާކުރި ކަމުގައި ވިޔަސް އީސީސީ އަޅާފައި ވަނީ ދިވެހި ދައުލަތުގެ ފައިސާއިންނެވެ. ރައްޔިތުންގެ ފައިސާއިންނެވެ.