ފޯނެއް ކުރުމަށް ކަމަށް ބުނެ މީހެއްގެ އަތުން ފޯނު އަތުލުމަށް ފަހު ފިލި ހިތަދޫ މީހަކު ޖަލަށް ލުމަށް ކްރިމިނަލް ކޯޓުން ޙުކުމްކޮށްފިއެވެ.
މީހެއްގެ މުދަލެއްގެ މައްޗަށް ހުއްދަ ނޫންގޮތުގައި ބާރު ފޯރުވުމުގެ ކުށުގައި 4 މަހާއި 24 ދުވަހަށް ޖަލަށް ލުމަށް ޙުކުމްކޮށްފައި ވަނީ، ސ.ހިތަދޫ ޗޮކްލެޓްގޭ މުޙައްމަދު ސަނީގެ މައްޗަށެވެ.
އޭނާ ޖަލަށް ލުމަށް ޙުކުމް ކޮށްފައި ވަނީ 2016 ވަނަ އަހަރުގެ ފެބްރުއަރީ މަހު ފޯނެއް ކޮށްލުމަށް ކަމަށް ބުނެ އޮޅުވާލައިގެން ފޯނު އަތުލައިގެން މާލޭގެ ގެއަކަށް ވަދެ އެނބުރި އައިސްފައި ނުވާކަމަށް ބުނެ ދައުލަތުން ކުރި ދައުވާއަށް އިޢުތިރާފުގެ މައްޗަށް ބިނާކޮށެވެ.
ފާއިތުވި ޑިސެމްބަރު މަހުގެ 28 ވަނަ ދުވަހު ކްރިމިނަލް ކޯޓުން އިއްވި ޙުކުމުގައި ބުނެފައިވާ ގޮތުން، މުހައްމަދު ސަނީ ވަނީ އެ މައްސަލައިގެ އިބްތިދާޢީ އަޑު އެހުމުގައި އަދި ޝަރީޢަތުގައި ވެސް ކުށަށް އިއުތިރާފްވެފައެވެ.