"ޕެޑް މޭން" އޭ ބުމުނުން މިއީ "ސްޕައިޑަމޭން" އާއި "ސްޕަމޭން" ކަހަލަ އާދަޔާހިލާފު ބާރުތަކެއް ލިބިފައިވާ ސްޕަހީރޯއެއްގެ ވާހަކައެއް ނޫނެވެ.
މިއީ މުޅިން ތަފާތު ކޮންސެޕްޓަކަށް، މުޅިން ތަފާތު ކަމެއް ގެނުވައި ދޭނެ ފިލްމެކެވެ. "ޕެޑް މޭން" ގައި ލޯޑް ރޯލުން ފެންނާނީ އަކްޝޭ ކުމާރެވެ.
މިއީ އަކްޝޭގެ އަންހެނުން އަދި ކުރީގެ ބަތަލާ ޓްވިންކަލް ކަންނާގެ ކޮންސެޕްޓަކަށް "ޕާ" ފަދަ ފިލްމްތައް ގެނެސް ދީފައިވާ މަޝްހޫރު ޑައިރެކްޓަރު އާރް ބަލްކީ ލިޔެ، ޑައިރެކްޓް ކުރާ ފިލްމެކެވެ. ފިލްމުގެ އެއް ޕްރޮޑިއުސަރަކީ ވެސް ޓްވިންކަން އެވެ.
"ޕެޑް މޭން" އަކީ ޓްވިންކަލް މިދިޔަ އަހަރު ކުރު ވާހަކަތަކެއް ހިމަނައިގެން ގެނެސް ދިން ފޮތް "ދަ ލެޖެންޑް އޮފް ލަކްޝްމަން ޕްރަސާދު" ގައި ހިމެނޭ އެއް ވާހަކަ އަށް ބިނާކޮށް ހަދާ ފިލްމެކެވެ.
"ޕެޑް މޭން" ގެ ވާހަކައަކީ އިންޑިއާގެ ރަށްފުށުގެ އަންހެނުންނަށް އެހީއެއްވުމުގެ ގޮތުން އިންޑިއާގެ ޓަމިލް ނާޑޫ އަށް ނިސްބަތްވާ އާދައިގެ ވިޔަފާވެރިއެއް ކަމަށްވާ އަރުނަޗަލަމް މުރުގަނަތަން ސެނިޓަރީ ނެޕްކިން ތައްޔާރު ކުރާ މެޝިން އީޖާދުކޮށް، އަންހެނުންގެ ސިއްހަތަށް އެހީއެއް ފޯރުކޮށް ދޭން ފެށި މަސައްކަތް ކިޔައިދޭ ފިލްމެކެވެ.
އޭނާގެ މި އާދަޔާހިލާފު މަސައްކަތުގެ އަގު ވަޒަންކޮށް އިންޑިއާގެ ސަރުކާރުން ވަނީ މިދިޔަ އަހަރު ޕަދްމަ ޝްރީ އެވޯޑް ވެސް ދީފަ އެވެ.
#PadMan #2017 pic.twitter.com/XUOEcMKVGI
— Akshay Kumar (@akshaykumar) January 1, 2017
"ޕެޑް މޭން" ގެ ފުރަތަމަ ޕޯސްޓަރު ވެސް އަކްޝޭ މިހާރު ވަނީ ޓްވިޓާގައި ދައްކާލައިފަ އެވެ.
ފިލްމުގެ ލީޑް ރޯލް އަކްޝޭ ކުޅޭ އިރު، މި ފިލްމުގެ ކާސްޓުންގެ ގޮތުގައި ދެން ތިބީ ކޮން ބައެއް ކަމެއް އަދި ނޭނގެ އެވެ.
އެކަމަކު ރިޕޯޓްތައް ބުނާ ގޮތުން ބަތަލާއެއްގެ ގޮތުގައި އަކްޝޭ އާ އެކު "ޕެޑް މޭން" އިން ފެނިގެން ދާނީ ސޯނަމް ކަޕޫރެވެ.