ވޯލްޑްކަޕް ތާރީހުގައި އެންމެ ގިނަ ގޯލްޖަހައި ޓޮޕް ސޯކޯރާ ހޯދާފައިވާ ޖަރުމަނުގެ ކުރީގެ ފޯވާރޑް މިރިސްލަވ ކްލޯސޭ މިފަހަރު އާއަހަރު ފާހަގަ ކުރަނީ އައްޑޫގައެވެ.
ކްލޯސޭ އާއި އޭނާގެ އަންހެނުން ސިލްވިއާ ކޯލޭސޭ އާއި ދެ ކުދިން ޗުއްޓީ ހޭދަކުރަމުންދަނީ ޝަންގްރިއްލާ ވިލިނގިލި ރިސޯޓް އެންޑް ސްޕާގައެވެ.
ކްލޯސޭގެ އާއިލާ އައްޑޫގައި ހޭދަކުރާތާ 10 ދުވަސްވެފައިވާ އިރު އޭނާ ހުރީ ރާއްޖޭގެ ރީތިކަން ފެނި އާޝޯޙްވެފައެވެ. ކްލޯސޭ އާއި އޭނާގެ އާއިލާއިން ޝަންގްރިއްލާ އާއި މެދު ވަރަށް ހިތްހަަޖެހޭކަމަށް އެތަނުގެ މުވައްޒަފުން ބުނެއެވެ.
މައުލޫމާތު ލިބިފައިވާ ގޮތުގައި ކްލޯސޭ މިހަފްތާތެރޭގައި އައްޑޫން ފުރާނެއެވެ.
ޖަރުމަނުގެ ގައުމީ ޓީމަށް 137 މެޗްގައި ކްލޯސޭ ވަނީ 71 ގޯލް ޖަހާފައެވެ. އަދި ވޯލްޑް ކަޕްގައި 4 ފަހަރު ކުޅެ 16 ގޯލް ޖަހައި ޓްޕް ސްކޯރާ ކަން ވަނީ ހޯދާފައެވެ. ކްލޯސޭ ކުޅުން ހުއްޓާލާފައިވަނީ 2014 ވަނަ އަހަރުގެ ވޯލްޑްކަޕްގެ ތަށި އުފުލާލުމަށްފަހުއެވެ.
ކްލޯސޭގެ އިތުރުން ދުނިޔޭގެ ނަން މަޝްހޫރު ގިނަ ފަންނާނުންނާއި، ކުޅިވަރު ކުޅުންތެރިން އާއަހަރު ފާހަގަކޮށްފައިވަނީ ރާއްޖޭގައެވެ. އޭގެ ތެރޭގައި އިނގިރޭސިވިލާތުގެ ކުރީގެ ކެޕްޓަން ޑޭވިޑް ބެކަމް އަދި އޭނާގެ އާއިލާ އާއި އިޓަލީގެ ޕީރްލޯ އާއި ނެދަލެންޑްގެ ރޮބެން ފަދަ ކުޅުންތެރިން ތިބީ ރާއްޖޭގައެވެ.