1. ބޭރަށް ހިނގުން ހުއްޓުވައިދޭ
ދިރާސާތަކުން ދައްކާފައިވާ ގޮތުގައި ހިކަނދި ފަތުގައި ހުންނަ ކާބެޒޯލް އަލްކަލޮއިޑްސް އަކީ އެންޓި-ޑައިރިއަލް މާއްދާ ތަކެކެވެ. މީދަލުގެ މައްޗަށް ކޮށްފައިވާ ލެބޯޓްރީ ޓެސްޓްތަކުން ދައްކާފައިވާ ގޮތުގައި ކާބެޒޯލް އަކީ ކޭސްޓާ ތެލުގެ ސަބަބުން ޖެހޭ ޑައިރިއާ ކޮންޓްރޯލް ކޮށްދޭ އެއްޗެކެވެ. ބޭރަށް ހިނގާނަމަ، ހިކަނދި ފަތް ފުނޑާފައި ހުހަށް ކެވިދާނެއެވެ. ނުވަތަ އޭގެ ޖޫސްވެސް ބުއިން ރަނގަޅެވެ.
2. އެންޓިއޮކްސިޑެންޓް މާއްދާތައް އެކުލެވިގެންވޭ
ދިރާސާތަކުން ދެއްކި ގޮތުގައި ހިކަނދި ފަތުގައި ގިނަ އަދަދަކަށް އެންޓިއޮކްސިޑެންޓްތައް ހިމެނިގެން ވެއެވެ. ހިކަނދި ފަތުގައި ވިޓަމިން އޭ، ބީ، ސީ އަދި އީ ފަދަ ވިޓަމިންތައް އެކުލެވިގެން ވުމަކީ އޮކްސިޑޭޓިވް ސްޓްރެސް ކުޑަކޮށްދީ ފްރީ ރެޑިކަލްތަކުގެ ޙަރަކާތްތައް ކުޑަކޮށްދޭ ކަމެކެވެ.
3. ހަކުރު ބަލިން ދިފާޢު ކޮށްދޭ
ހިކަނދި ފަތުން ލިބިދޭ އެންމެ މުހިންމު ސިއްޙީ ފައިދާއަކީ ހަކުރު ބަލި ކޮންޓްރޯލް ކުރުމުގައި ހިކަނދި ފަތް އަދާ ކުރާ ރޯލެވެ. ޗެންނާއިގެ ޔުނިވާސިތީ އޮފް މެޑްރާސްގެ ޑިޕާޓްމެންޓް އޮފް ބަޔޯކެމިސްޓްރީ އެންޑް މޮލެކިއުލާ ބައޮލޮޖީއިން ކުރި ދިރާސާއަކުން ދެއްކި ގޮތުގައި ހިކަނދި ފަތުގައި ހުންނަ އެންޓި-ހައިޕާގްލައިސީމިކް މާއްދާތަކުގެ ސަބަބުން ލޭގައި ހަކުރު ހުންނަ މިންވަރު ކޮންޓްރޯލް ވެގެންދެއެވެ.
4. ކެންސަރާއި ހަނގުރާމަ ކޮށްދޭ
ހިކަނދި ފަތުގައި ހިމެނިގެންވާ ފީނޯލް ފަދަ ކެމިކަލްތަކަކީ ލިއުކީމީއާ އަދި ޕްރޮސްޓޭޓް ކެންސަރު ފަދަ ކެންސަރު ތަކާއި ހަނގުރާމަ ކުރުމަށް އެހީވެދޭ އެއްޗެކެވެ. އަދި ޖަޕާންގެ ޔުނިވާސިޓީއަކުން ކުރި ދިރާސާއިން ދެއްކި ގޮތުގައި ހިކަނދި ފަތުގައި ހުންނަ ކާބެޒޯލް އަލްކަލޮއިޑްސް އަކީވެސް ކެންސަރާއި ހަނގުރާމަ ކުރުމަށް އެހީވެދޭ މާއްދާތަކެކެވެ.
5. ކޮލެސްޓްރޯލް ލެވެލް ދަށްކޮށްދޭ
ހިކަނދި ފަތަކީ ނުބައި ކޮލެސްޓްރޯލް ކަމަށްވާ އެލްޑީއެލް ކޮލެސްޓްރޯލްގެ ލެވެލް ދަށްކޮށްދޭ އެއްޗެކެވެ. އިންޑިއާގެ ޔުނިވާސިޓީ އޮފް ކެރަލާއިން ކުރި ދިރާސާތަކުގައި މިކަން ވަނީ ސާބިތު ވެފައެވެ.
6. އިސްތަށި އުފައްދައިދޭ
ޤަބޫލު ކުރެވޭ ގޮތުގައި ހިކަނދި ފަތަކީ އިސްތަށި ވަރުގަދަ ކޮށްދޭ އެއްޗެކެވެ. ހިކަނދި ފަތް ޕައުޑަރު ތެލާއި އެއްކުރުމަށްފަހު އިސްތަށިގަނޑުގައި މަސާޖު ކުރުމަކީ ރަނގަޅު ކަމެކެވެ. އަދި ހަމަ އެހެންމެ ބޮލުގައި ނުރަ ޖަހާނަމަވެސް ހިކަނދި ފަތުން ހަދާ ޕޭސްޓް ބޭނުން ކުރެވިދާނެއެވެ. މިކަންތައްތައް ޤަވާއިދުން ކުރުމަކީ އިސްތަށި އުފެދުން އިތުރު ކޮށްދޭ ކަމެކެވެ.
7. ލޮލުގެ ފެނުމަށް ރަނގަޅު
ހިކަނދި ފަތުގައި ވަރަށް ގިނަ އަދަދަކަށް ވިޓަމިން އޭ ހިމެނިގެންވުމާއިއެކު އެއީ ލޮލުގެ ފެނުމަށް ވަރަށް ރަނގަޅު އެއްޗެކެވެ. ވިޓަމިން އޭގައި ލޮލުގެ ކޯނިއާ ރައްކާތެރި ކޮށްދޭ ކެރޮޓިނޮއިޑްތައް ހިމެނެއެވެ. ހަށިގަނޑުގައި ވިޓަމިން އޭ ހުންނަ މިންވަރު މަދުނަމަ، ނައިޓް ބްލައިންޑްނެސް (ރޭގަނޑު ނުފެނުން) އާއި ކުރިމަތިލާން ޖެހިދާނެއެވެ. އަދި ބައެއް ހާލަތްތަކުގައި ލޮލުގެ ފެނުން މުޅިން އެއްކޮށް ގެއްލިގެންވެސް ހިނގައިދާނެއެވެ.
8. މޭ ރައްކާތެރިކޮށްދޭ
ލިވާ (މޭގަނޑު) އަކީ ހަޖަމް ކުރުމުގެ ނިޒާމުގައި ވަރަށް ބޮޑު ރޯލެއް އަދާކުރާ ގުނަވަނެކެވެ. އެހެންކަމުން ފްރީ ރެޑިކަލްތަކާއި، ވައިރަސް އަދި ބެކްޓީރިއާގެ ހަމަލާތަކުން ލިވާ ރައްކާތެރި ކުރަން ޖެހެއެވެ. އެހެން ނޫންނަމަ، ލިވާއަށް އިންފެކްޝަން ޖެހުމަކީ ގާތް ކަމެކެވެ. ހިކަނދި ފަތާއި ގުޅޭ ދިރާސާތަކުން ދައްކާފައިވާ ގޮތުގައި އެފަތުގައި ހުންނަ ޓެނިންސްއާއި ކާބެޒޯލް އަލްކަލޮއިޑްސް އަކީ ހެޕަޓޯ-ޕްރޮޓެކްޓިވް މާއްދާތަކެކެވެ. އެހެންކަމުން ހެޕަޓައިޓިސް އާއި ކައިރޯސިސް ފަދަ ލިވާއަށް ޖެހޭ އެކިއެކި ބަލިތަކުން ރައްކާތެރި ކޮށްދެއެވެ.
9. ހަމަށް ފައިދާހުރި އެއްޗެއް
ހިކަނދި ފަތަކީ ހަންގަނޑަށްވެސް ވަރަށް ރަނގަޅު އެއްޗެކެވެ. އަނދާފައިވާ ތަންތަނަށާއި، ކަނޑައިގެން ގޮސްފައިވާ ތަންތަނާއި ސޫފާސޫފި ހަފާފައިވާ ތަންތަނުގައި ހިކަނދި ފަތުގެ ޖޫސް ނުވަތަ ޕޭސްޓް އުނގުޅުމަކީ ވަރަށް އަވަހަށް އެޒަޚަމްތައް ރަނގަޅު ކޮށްދޭ ކަމެކެވެ.