ޕީޕީއެމް ދެފަޅި ވުމާއި އެކު ކުރީގެ ރައީސުލްޖުމްހޫރިއްޔާ މައުމޫން އަބްދުލްގައްޔޫމާއި ރައީސް އަބްދުﷲ ޔާމީންއާ ދެމެދު އުފެދުނު ކޯޅުންގަނޑަށް ފަހު އެންމެ ފަހުން ރައީސް މައުމޫންގެ އާއިލާ ވެސް ދެފަޅިވެއްޖެއެވެ.
ރައީސް ޔާމީންގެ ވެރިކަމުގައި އެންމެ ހިންގުންތެރި މިނިސްޓަރުގެ ގޮތުގައި ގިނަ ދުވަސްތަކެއްވާންދެން މަސައްކަތް ކުރެއްވި ކުރީގެ ފޮރިން މިނިސްޓަރ ދުންޔާ މައުމޫން މިވަނީ އަނެއްކާވެސް އެނބުރި ސަރުކާރާއި ގުޅިވަޑައިގެންފައެވެ. ދުންޔާ މައުމޫން ސަރުކާރުން އިސްތިއުފާ ދެއްވީ މަރުގެ އަދަބު ދިނުމާއި ބެހޭގޮތުން އުފެދުނު ޚިޔާލު ތަފާތުވުމެއްގައި ކަމަށް ބުނެއެވެ.
އެހެން ނަމަވެސް މިއަދު އެކަމަނާ، މިވަނީ ހެލްތް މިނިސްޓްރީގެ ސްޓޭޓް މިނިސްޓަރަކަށް އައްޔަން ކުރައްވާފައެވެ. ދުންޔާ އެ މަޤާމަށް އައްޔަން ކުރެއްވިތާ ކުޑަވަގުތު ކޮޅެއްގެ ތެރޭގައި، އެކަމަނާއާއި އެއްމާބަޑު ޔުމްނާ މައުމޫން ވަނީ އެކަމަށް ކޮމެންޓް ކުރައްވާފައެވެ.
ދުންޔާ މައުމޫން ކުރެއްވި ޓްވީޓެއްގައި ވިދާޅުވެފައި ވަނީ، ދުންޔާ އެ ނިންމެވީ އަމިއްލަ ނިންމެވުމެއް ކަމަށާއި އަޅުގަނޑު އިރާދަކުރެއްވިއްޔާ ހުންނާނީ ސާބިތުކަމާއި އެކު ރައީސް މައުމޫންގެ އަރިހުގައި ހައްޤުގެ މަގުގައި ކަމަށެވެ.
ޔުމްނާގެ އިތުރުން ބައްޕާފުޅު ރައީސް މައުމޫން ވެސް ވަނީ ދުންޔާގެ ނިންމެވުމަށް ތާޢީދު ނުކުރައްވާކަން ހާމަކުރައްވާފައެވެ. މައުމޫނު ކުރެއްވި ޓްވީޓެއްގައި ވިދާޅުވެފައި ވަނީ، ދުންޔާގެ ނިންމުމަކީ އޭނާގެ އަމިއްލަ ނިންމުމެއް ކަމަށާއި އަލުން ސަރުކާރާއި ގުޅިވަޑައިގަތުމަށް ތާޢީދު ނުކުރައްވާ ކަމަށެވެ.
ދުންޔާގެ ނިންމެވުމާއި އެކު ސޯޝަލް މީޑިޔާގައި ގިނަ ބަޔަކު ގެންދަނީ އެކަމަށް ފާޑުކިޔައި ވާހަކަ ދައްކަވަމުންނެވެ.